ՍՄԲԱՏ ՄԱՐԳԱՐՅԱՆԸ ՉԱՐԴԱՐԱՑՐԵՑ ՍՊԱՍԵԼԻՔՆԵՐԸ Կազանում մեկնարկած համաշխարհային 27-րդ Ունիվերսիադայի ծանրամարտի մրցումներում Հայաստանը ներկայացնող 3 ծանրորդներից առաջինը մրցահարթակ դուրս եկավ մինչեւ 56 կգ քաշային Սմբատ Մարգարյանը: Մասնագետները նրան հաղթողի հավակնորդների թվում էին դասում, սակայն հայ ծանրորդը չարդարացրեց սպասելիքները: Պոկում վարժությունում նա միայն առաջին մոտեցումը հաջող կատարեցՙ բարձրացնելով 100 կգ: Իսկ 105 կգ-անոց ծանրաձողը նրան այդպես էլ չենթարկվեց: Պատմությունը կրկնվեց նաեւ հրում վարժությունում, միայն այն տարբերությամբ, որ նախնական 135 կգ-ը Սմբատը վերջապես բարձրացրեց 3-րդ փորձից: Երկամարտի 235 կգ (100+135) համեստ արդյունքով Սմբատը զբաղեցրեց 8-րդ տեղը 14 ծանրորդների մրցավեճում: Ունիվերսիադայի չեմպիոն հռչակվեց չինացի Քսյու Յինգուին, որը երկամարտում ցույց տվեց 264 կգ (115+149) արդյունք: Նրան 14 կգ-ով զիջեց Ինդոնեզիայի ներկայացուցիչ Սուրահմատ Բին: Բրոնզե մեդալը նվաճեց մոլդովացի Օլեգ Սիրգնինՙ 246 կգ (103+143): | 
