ԵԳԻՊՏՈՍԻ ՆԳ ՆԱԽԱՐԱՐՆ ԻՍԼԱՄԻՍՏՆԵՐԻՑ ՊԱՀԱՆՋԵՑ ՀԵՌԱՆԱԼ ՀՐԱՊԱՐԱԿՆԵՐԻՑ Սինայն արդեն ռազմական գոտի է Եգիպտոսի ժամանակավոր իշխանությունները մտածում են Կահիրեում արտակարգ դրություն հաստատելու մասին: Նման քայլի շնորհիվ պետք է կարգուկանոն հաստատվի այն թաղամասերում, որտեղ արդեն 1 ամիս ցույցեր են անում պաշտոնանկ նախագահ Մուհամմեդ Մուրսիի կողմնակիցները: Սպանության եւ առեւանգումների մեղադրանքով Մուրսիի ձերբակալությունից հետո անկարգությունների նոր ալիք է սկսվել: Շաբաթավերջին ոստիկանների եւ իսլամիստների բախումների ընթացքում սպանվեց 80 մարդ, վիրավորվեցին հարյուրավոր ցուցարարներ: Նրանցից մեկըՙ Խալեդ Հաշեմը, BBC-ի թղթակցին ասել է, թե ոստիկանները զենք են կիրառել խաղաղ երթի մասնակիցների դեմ: Ոստիկանությունը պնդում է, թե ցուցարարների դեմ կիրառվել է միայն արտասվաբեր գազ, իսկ սադրանքներ կազմակերպել են հենց իսլամիստները, որոնցից շատերը կալանավորվել են հրազենը ձեռքներին: Եգիպտոսի ներքգործնախարար Մուհամմեդ Իբրահիմը երկուշաբթի օրը իսլամիստներից պահանջել է հեռանալ քաղաքային հրապարակներից, այլապես «ոստիկանությունը կգործի անչափ կոշտ ձեւով»: Սակայն Մուրսիի կողմնակիցները մտադիր չեն հեռանալ: Ընդհակառակը, հեռանում են Կահիրեի բազմաթիվ բնակիչներ, որոնց կյանքը դժոխային է դարձել չորս շաբաթ օր ու գիշեր չդադարող հանրահավաքների ու ցույցերի պատճառով: Զինված ուժերի շտաբը Սինայի թերակղզի է մտցրել 2-րդ եւ 3-րդ դաշտային բանակները, զրահատեխնիկա, տանկեր, որպեսզի ջիհադիստական զինված խմբավորումները չկարողանան թափանցել Կահիրե, իսկ Գազայի հատվածի գրոհայինները չմիանան «Մուսուլման եղբայրների» կողմնակիցների ջոկատներին: Գործողությունը կոչվում է «Անապատի փոթորիկ»: Թերակղզու հյուսիսում եւ կենտրոնում զորքերին դիմակայում են հազարավոր զինված իսլամիստներ: Սինայի մատույցները փակ են, այսօր դա ռազմական գոտի է: | 
