ՀԱՅԵՐԻՑ ԼԱՎԱԳՈՒՅՆԸ ՏԻԳՐԱՆ Ս. ՊԵՏՐՈՍՅԱՆԻ ԱՐԴՅՈՒՆՔՆ Է Թբիլիսիում անցկացված շախմատի կանանց աշխարհի նախկին չեմպիոնուհի Նոնա Գափրինդաշվիլու գավաթի խաղարկությանը մասնակցած մի խումբ հայ շախմատիստներից բոլորից հաջողը ՖԻԴԵ-ի վարպետ Տիգրան Ս. Պետրոսյանի ելույթն էր: Տիգրանը 9 հնարավորից վաստակած 7 միավորով լրացուցիչ գործակիցները հաշվի առնելով զբաղեցրեց 4-րդ տեղը: Նա ընդամենը կես միավոր զիջեց մրցաշարի հաղթող վրացի Լուկա Պայչաձեին եւ նրա հայրենակից Լեւան Պանցուլայային: Տիգրանը մրցաշարում ընդամենը մեկ պարտություն կրեցՙ 8-րդ տուրում զիջելով Պանցուլայային, ինչն էլ ճակատագրական եղավ հայ շախմատիստի համարՙ զրկելով նրան գլխավոր մրցանակին արժանանալու հնարավորությունից: Պետրոսյանը հաղթեց Գիա Կիտեսաշվիլուն, Սուսաննա Գաբոյանին, Գեորգի Բագատուրովին, Դավիթ Բենիձեին, Օլեգ Կոռնեեւին եւ Շոթա Ազալաձեին, ոչ-ոքի խաղաց Գիգա Քուփարաձեի եւ Մերաբ Գագունաշվիլու հետ: Պետրոսյանից հետո հայ շախմատիստներից լավագույն արդյունքը ցույց տվեցին Դավիթ Շահինյանը, Հայկ Վարդանյանը, Նորայր Թորոսյանը, Դավիթ Տիրատուրյանն ու Գրիգոր Դիլանյանը, որոնք վաստակեցին 6-ական միավոր: Գրոսմայստեր Արթուր Չիբուխչյանը 5,5 միավորով 162 մասնակիցների մեջ 30-րդն էր, իսկ Լիլիթ Գալոյանը նույնպիսի արդյունքով գրավեց 45-րդ տեղը: | 
