ՀԱՋՈՂ ՏՈՒՐ ՀԱՅ ՇԱԽՄԱՏԻՍՏՆԵՐԻ ՀԱՄԱՐ Թուրքիայում ընթացող մինչեւ 20 տարեկանների շախմատի աշխարհի առաջնության 5-րդ տուրը հաջող էր հայ շախմատիստների համար: Վահե Բաղդասարյանը հաղթեց ֆիլիպինցի Ջերարդ Դոկենային, Սամվել Տեր-Սահակյանը պարտության մատնեց պորտուգալացի Պեդրո Նեւեսին: Վահեն 3,5 միավորով 23-րդ տեղում է, Սամվելը 3 միավորով զբաղեցնում է 44-րդ հորիզոնականը: Մրցաշարային աղյուսակը գլխավորում են չինացի Յույ Յանյին եւ հնդիկ Սետուրամանը, որոնք ունեն 4,5-ական միավոր: Յանյին առաջին կես միավորը կորցրեցՙ հաշտություն կնքելով Թուրքիան ներկայացնող Ալեքսանդր Իպատովի հետ: Իսկ հնդիկ շախմատիստը հաղթեց ռուսաստանցի Անդրեյ Ստուկոպինին: 10 շախմատիստներ 4-ական միավորով հետապնդում են առաջատարներին: Կանանց մրցաշարում Մարիա Գեւորգյանը կրկին ոչ-ոքի խաղացՙ միավորը կիսելով հնդիկ Կրիշնա Անջանայի հետ: Մարիան 2,5 միավորով 47-րդ տեղում է: Աղյուսակը 4,5-ական միավորով գլխավորում են ինդոնեզացի Վարդա Մեդինան, ռուսաստանցի Ալինա Կաշլինսկայան եւ ռումինացի Իրինա Բուլմագան: | 
