ՍԱՄՎԵԼ ՏԵՐ-ՍԱՀԱԿՅԱՆԸ ՄՈՏԵՑԱՎ ԱՌԱՋԱՏԱՐՆԵՐԻՆ Թուրքիայում ընթացող մինչեւ 20 տարեկանների շախմատի աշխարհի առաջնության հերթական 2 տուրերը հաջող էին Սամվել Տեր-Սահակյանի համար: Հաղթելով Թոմաս Լաուրուսասին եւ Վլադիսլավ Կովալյովին, Սամվելը 9 հնարավորից վաստակեց 6,5 միավորՙ հանգրվանելով 7-րդ հորիզոնականում: Այդ հաղթանակները Սամվելին մրցանակակիր դառնալու հնարավորություն ընձեռեցին: Սակայն մեդալ նվաճելու համար հարկավոր է վերջնագծում շարունակել հաղթարշավը: 8 միավորով աղյուսակը գլխավորում է Թուրքիան ներկայացնող Ալեքսանդր Իպատովը: Նա 2 անընդմեջ հաղթանակ տոնեց Սետուրամանի եւ Սանթոս Վիդիթի նկատմամբ եւ շրջանցեց չինացի Յույ Յանյիին: Վերջինս հաշտություն կնքեց Յորգ Կորիի եւ Սահաջ Գրովերի հետ: 7 միավոր է վաստակել Յորգ Կորին: Վահե Բաղդասարյանի համար հերթական 2 տուրերը շատ անհաջող էին: Նա պարտվեց Ալեքսանդր Ինջիչին եւ Սիմոնե դե Ֆիլոմենոյին: Վահեն 4,5 միավորով 55-րդ տեղում է: Կանանց մրցապայքարում Մարիա Գեւորգյանը 5 միավորով 35-րդ տեղում է: Նա 8-րդ տուրում հաղթեց վիետնամցի Նգուեն Հունգին, իսկ հաջորդ պարտիայում պարտվեց ղազախ Դինարա Սադվակասովային: 7,5 միավորով աղյուսակը գլխավորում է ռումինուհի Իրինա Բուլմագան: Նա ոչ-ոքի խաղաց Մերի Արաբիձեի հետ ու հաղթեց Ալինա Կաշլինսկայային: Առաջատարից կես միավոր է հետ մնում ռուսաստանցի Ալեքսանդրա Գորյաչկինան: 4 շախմատիստուհիներ ունեն 6,5-ական միավոր: | 
