ՀԱՅԿԱԿԱՆ ՈՒՍՈՒՄՆԱՍԻՐՈՒԹՅՈՒՆՆԵՐԸ ԽԹԱՆԵԼՈՒ ՆՊԱՏԱԿՈՎ Հ. Ծ. Հայկական ուսումնասիրությունների եւ հետազոտությունների ազգային Ասոցիացիան (NAASR) Բելմոնտում (Մասաչուսեթս, ԱՄՆ) հայտարարել է, որ դոկտ. Սոնա Արոնյանը գերազանցության նոր մրցանակ է հաստատել, որը շնորհվելու է յուրաքանչյուր տարի անգլերեն լեզվով գրված կամ հայերենից անգլերենի թարգմանված հայկական թեմաների ուսումնասիրությունների բնագավառում գիտական մի մենագրության, որն իր գիտական մակարդակով արժանի կհամարվի մրցանակին: «Մեր կազմակերպութան երկարամյա անդամներից դոկտ. Արոնյանի այս նախաձեռնությունը մեծ խթան է հանդիսանալու նոր ուսումնասիրությունների», նշել է այս առթիվ NAASR-ի ակադեմիական տնօրեն Մարկ Մամիկոնյանը : Դոկտ. Արոնյանը պատվավոր պրոֆեսոր է ռուսերենի, համեմատական գրականության եւ կանանց վերաբերող խնդիրների ուսումնասիրությունների: Դասավանդում է Ռոուդ Այլենդի համալսարանում: Սլավոնական լեզուների եւ գրականության գծով դոկտորայի աստիճան է ստացել Եյլ համալսարանից: Արխիվային ուսումնասիրություններ է կատարել Մոսկվայում, Սանկտ-Պետերբուրգում, Պրահայում եւ Փարիզում: Մասնագիտացել է հատկապես ռուս մոդերնիստ գրող Ալեքսեյ Ռեմիզովի գրական ժառանգության մեջ եւ քանիցս հանդես եկել նրա մասին զեկուցումներով միջազգային կոնֆերանսներում: | 
