ՀՈՎՀԱՆՆԵՍ ԱՅՎԱԶՈՎՍԿՈՒ «ԻՆՆԵՐՈՐԴ ԱԼԻՔ»-Ըՙ ԱՇԽԱՐՀԻ ԼԱՎԱԳՈՒՅՆ ԾՈՎԱՆԿԱՐՆԵՐԻ ՏԱՍՆՅԱԿՈՒՄ Մ. Բ. Միջազգային հեղինակավոր The Greative Business բլոկը (արվեստիՙ հիմնականումՙ գեղանկարչական եւ լուսանկարչական գործերի) ներկայացրել է աշխարհի լավագույն տասը ծովանկարների ցանկՙ կազմված գերմանացի հայտնի արվեստաբան, նկարչուհի Անդրեա Բեքլենդի կողմից, որի մեջ ընդգրկված է նաեւ Հովհաննես Այվազովսկու «Իններորդ ալիք» կտավը: Այս շարքում են Աբրահամ Ուիլարեթսի «Փոթորկոտ ծովը» (1629թ.), Հոքուսայի «Կանգավայի հսկա ալիքը» (1829-1832), Ուիլյամ Թյորների «Սառցե փոթորիկ » (1842թ.), Կլոդ Մոնեի «Էտրետատի փոթորկոտ ծովը» (1883) եւ այլ գործեր: «Իններորդ ալիքը» Այվազովսկու հազարավոր ծովանկարներից ամենահայտնին է, նկարիչն այն վրձնել է 1850թ.ՙ ծովի ահեղ պատկերը բնութագրելով որպես մահաբեր իններորդ ալիք: 1897-ին Նիկոլայ 1-ինը այն գնել է Էրմիտաժի համար. այժմ գտնվում է Սանկտ Պետերբուրգի Ռուսական թանգարանում: Հիշյալ բլոկը ստեղծել են Եվրոպայում եւ ԱՄՆ-ում գործունեություն ծավալող մի խումբ նկարիչներ, լուսանկարիչներ, արվեստաբաններՙ նպատակ ունենալով սոցմեդիայի միջոցով աշխարհին ներկայացնել ընթացիկ կարեւոր ցուցահանդեսներ, հայտնի թանգարաններում, պատկերասրահներում տեղի ունեցող նշանակալի իրադարձություններ: Միաժամանակ հիմնադիրները փորձում են արվեստը նաեւ գործարար տեսանկյունից ներկայացնել. վերլուծումների, կարծիքների միջոցով ցույց տալ, որ ֆինանսական լավագույն ներդրումը արվեստի գործեր գնելն է: Այս մասին տեղեկացնում է արեւմտահայերեն լրատվական http://www.yerakouyn.com/ կայքը: | 
