«Moderato Cantabile». ԱՐԵՎԵԼՔ - ԱՐԵՎՄՈՒՏՔ ՀԱՆԴԻՊՈՒՄ ԱՆԱՀԻՏ ՀՈՎՍԵՓՅԱՆ, Գերմանիա Թավջութակահարուհի Անյա Լեյհները (Anja Lechner) եւ դաշնակահար Ֆրանսուա Քութուրիեն (FranCois Couturier) ներկայանում են նոր սկավառակովՙ 2013-ին Լուգանոյում ձայնագրված (ECM Records) ու 2014-ի սեպտեմբերի սկզբին շուկայում հայտնված «Moderato Cantabile» ամփոփում է19-րդ, 20-րդ դարասկզբի երեք տպավորիչ ստեղծագործողներիՙ Գյուրջիեւի, Կոմիտասի, Ֆեդերիկո Մոմփուի (Federico Mompou) երաժշտական աշխարհայացքը: Խիստ ներդաշնակ զուգանվագն առաջին հնչյուններից արդեն տպավորում էՙ գրեթե մեդիտատիվ ուշադրություն ակնկալող,դեպի ներս խորասուզվելու զգացողություն պարգեւում, ծանուցում է գերմանական «JAZZECHO» ամսագիրը: Երկու գործիքներիՙ թավջութակի եւ դաշնամուրի փոխլրացնող գեղագիտությունն այստեղ թավջութակին վերապահում է երգչի դերակատարում, իսկ միասնական շունչն ու նրբերանգավորված դարձվածքները կռահել են տալիս, որ երկու երաժիշտներին արդեն տարիների համագործակցությունն է հարստացնում: Ալբոմը կարող էր նաեւ «Արեւելք եւ Արեւմուտք» վերնագիրն ունենալ, գրում է երաժշտական հանդեսը, քանի որ այն Արեւելքի հնչյունների աշխարհը կամրջում է Արեւմուտքին: Երաժշտության պատմության կախարդիչ 3 անունՙ հույն-հայ ծագմամբ գրող, պարուսույց, կոմպոզիտոր Գեորգի Գյուրջիեւ, հայ դասական երաժշտության ռահվիրա, երգիչ եւ երաժշտագետ Կոմիտաս վարդապետ եւ 20-րդ դարասկզբի իսպանացի կոմպոզիտոր եւ դաշնակահար Ֆեդերիկո Մոմպու: Հիշյալ ձայնագրության մեջ կատարողներն ընտրել են հայ երաժշտության այնպիսի նմուշներ, որպիսիք ներկայացնում են արեւելյան ազդեցությունների տարաշերտ ուժգնությունը, ուր անգամ փիլիսոփայական տեսանկյունից խզված չէ կապը ազգագրական եւ հոգեւոր երաժշտության միջեւ: Ինչ վերաբերում է արեւմտյան աշխարհը ներկայացնող երրորդ կոմպոզիտորին, ապա ակնհայտ է, որ իսպանացի երաժշտափիլիսոփան ֆրանսիացի իմպրեսիոնիստների ազդեցությունն է կրումՙ մասնավորապես Էրիկ Սաթիեի ( Erik Satie): «Moderato Cantabile» ձայնասկավառակը մշակութային դաշտերն ու ինքնությունները տատանող, մշակույթների հակադրությունն ու փոխլրացնող տարրերը երեւակող երաժշտական ճամփորդություն էՙ լի անսահման գեղեցիկով: | 
