ՄԻՋԱԶԳԱՅԻՆ ԵՐԱԺՇՏԱԿԱՆ ՄՐՑՈՒՅԹ ՆՎԻՐՎԱԾ ԴԱՆԻԵԼ ՎԱՐՈՒԺԱՆԻՆ Հ. Ծ. Հայկական բարեգործական ընդհանուր միության նյույորքյան մայր գրասենյակը վերջերս հրապարակել է 2014 թվի «Սայաթ-Նովա» միջազգային երաժշտական մրցույթի հաղթողների անունները: Առաջին մրցանակը շնորհվել է Հովիկ Սարդարյանին, 21 տարեկան, Հայաստանից: Երկրորդըՙ Ֆուն Գորդոն Դիկ-Լունին, 26 տարեկան, Հոնկոնգից, իսկ երրորդըՙ Ռիչարդ Մելքոնյանին, 25 տարեկան, Մեծ Բրիտանիայից: «Սայաթ-Նովա» միջազգային երաժշտական ստեղծագործությունների մրցույթը կազմակերպվում է հայկական երաժշտական ավանդույթները առավել լայն շրջանակներին ծանոթացնելու նպատակով: Ցեղասպանության հարյուրամյա տարելիցի առիթով կազմկոմիտեն խնդրել էր մասնակիցներից իրենց ստեղծագործությունները նվիրել Ցեղասպանության զոհ գնացած բանաստեղծ Դանիել Վարուժանի քերթվածներից որեւէ մեկին: Ներկայացվել են գործեր տարբեր երկրներից (ներառյալ Ռուսաստանը, Շվեյցարիան եւ Բրազիլիան) եւ Մ. Նահանգների 14 նահանգներից: Մասնակիցների 60 տոկոսը եղել են օտարներ: Ժյուրիի կազմում են եղել Էդուարդ Թոփչյանը, Յակով Յակուլովը, Հասմիկ Պապյանը, Ջեննի Չայը, Պոլ Մեֆանոն եւ Միշել Պետրոսյանը: Երեք մրցանակակիրների ստեղծագործությունները հնչելու են Նյու Յորքի «Սիմֆոնի Սփեյս» համերգասրահում հառաջիկա մայիսի 11-ին: Տեղեկությունըՙ «Արմինյն Միրոր-Սփեքթեյթր» շաբաթաթերթից: | 
