«ԲԵՄԱԴՐԵԼՈՎ ԱՆԲԵՄԱԴՐԵԼԻՆ»ՙ ՀԱՏՈՒԿ ԸՆԹԵՐՑՈՒՄՆԵՐ ԼՈՍ ԱՆՋԵԼԵՍՈՒՄ Հ. Ծ. Մեծ եղեռնի հարյուրամյակի հիշատակումը նշանավորվելու է «Բեմադրելով անբեմադրելին: Բռնությունը դրամատիկացնելու էսթետիկան» խորագրով հատուկ ընթերցումների կատարումով, որ տեղի է ունենալու Լոս Անջելեսի «Քըրք Դուգլաս» թատրոնի շենքում առաջիկա ապրիլի 28-ին, տեղեկացնում է «Թատերական խմբավորման կենտրոնի» լրատվական գրասենյակը, որը «Դրամատիկական արտիստների հայկական միության» համագործակցությամբ նախաձեռնողն է այդ միջոցառման: Հիշատակման միջոցառմանը ընթերցվելու են հատվածներ Հայոց ցեղասպանությունը ամենատարբեր կողմերից ներկայացրած պիեսներից: Այնուհետեւ կլոր սեղանի շուրջ քննարկումներ են տեղի ունենալու հայ համայնքի եւ լոսանջելեսյան թատերական աշխարհի ճանաչված օտար ներկայացուցիչների մասնակցությամբ: Հիմնական թեմաներն են լինելու «Թատրոնը դերակատարություն ունի՞ պատմական մեղքերը բեմ բարձրացնելու եւ մոռացությունից փրկելու գործում», եւ «Ինչպե՞ս կարող է դրամատուրգը բեմ բարձրացնել նման ողբերգություններ» հարցերը: Ընթերցումների «ներկայացումը», ըստ տեղեկատվության, մաս է կազմում Դուգլաս թատրոնի «Դուգլաս-պլյուս» ծրագրի, որի նպատակն է նոր հորիզոններ բացել թատերական աշխարհում: Նկար 1. «Քըրք Դուգլաս» թատրոն | 
