ՀԱՐԳԱՆՔԻ ՏՈՒՐՔ ՄԿՐՏԻՉ ՆԱՂԱՇԻՆ Հ. Ծ. Հայ միջնադարյան քնարերգության մեջ առաջինը, ով ստեղծագործության նյութ է դարձրել պանդխտության թեման, եղել է տաղանդավոր տաղերգու, նկարիչ, հասարակական-եկեղեցական գործիչ Մկրտիչ Նաղաշը (XV դար, «Տաղ վասն Ղարիպի ասացեալ»): Ինքը լինելով պանդխտության մեջ, տեսել ու զգացել է այդ վիճակի ողջ դառնությունը: «Արմինյն Միրոր-Սփեքթեյթր» շաբաթաթերթը Լոս Անջելեսից տեղեկացնում է, որ Հայաստանի «Նաղաշ» համույթը դրամահավաք է նախաձեռնել թողարկելու համար իր երկրորդ խտասալիկը (CD)ՙ «Պանդխտության երգեր» խորագրով եւ դրան ուղեկցող 52 էջանոց գիրքըՙ հայերեն, անգլերեն, ֆրանսերեն եւ գերմաներեն լեզուներով: Գրքում ներկայացված ընդարձակ տեղեկությունը գաղափար է տալու ինչպես Մկրտիչ Նաղաշի հարուստ եւ բազմաբովանդակ կյանքի ու ստեղծագործության, այնպես էլ «Նաղաշ» համույթի անցած ուղու մասին: Ամերիկահայ երգահան Ջոն Հոդյանի «Պանդխտության երգեր» ստեղծագործությունը հոգեկան տվայտանքների նրբահյուս խորհդածություն է Աստծո հետ մարդու, տվյալ դեպքում տարագիր հոգեւորականի, հարաբերությունների մասին: Գերմանական «Armenisch-Deutsche korrespondenz» թերթի բնորոշմամբ «Նաղաշ» համույթն իր երեք հրաշալի կին վոկալիստներով եւ դուդուկի, ուդի, դհոլի եւ դաշնամուրի գերազանց կատարող-վարպետներով հոգեւոր միջնադարյան երաժշտությունը ներկայացնում է նոր, ժամանակակից դասական մեկնաբանությամբ: | 
