ԲԵՅՐՈՒԹՈՒՄ ՄԵԾԱՐԵԼ ԵՆ ՊԵՐՃ ՖԱԶԼՅԱՆԻՆ Հ. Ծ. Բեյրութի ՀԲԸՄիության գրասենյակը եւ Հայ երիտասարդաց միության Անդրանիկ մշակութային ընկերակցությունը հոկտեմբերի 8-ին ՀԲԸՄ-ի Դեմիրջյան կենտրոնում մեծարել են լիբանանահայ ճանաչված բեմադրիչ եւ դերասան Պերճ Ֆազլյանին (1926-2016): Բազմաթիվ օտարազգիների ներկայությամբ միջոցառումը վարել է Ժիրայր Ավետիսյանը , ով իր բացման խոսքում նշել է, որ Ֆազլյանը գրել է արաբերեն, հայերեն, ֆրանսերեն եւ թուրքերեն լեզուներով ավելի քան 100 թատերգություն, որոնք իրենց ուրույն տեղն ունեն թատերական պատմության մեջ: 1959-ին հիմնել է ՀԵԸ-ի «Վահրամ Փափազյան» թատերախումբը, որը ղեկավարել է մինչեւ 1971 թիվը: Խոսք է առել նաեւ Հակոբ Վարդիվառյանը , որ վերհիշել է Թուրքիայից 1954 թվին Ֆազլյանի Լիբանան տեղափոխվելը, թատերախմբի կայացման գործընթացը եւ Թեքեյան մշակութային միության հետ նրա համագործակցությունը: Ելույթներ ունեցել են նաեւ լիբանանցի կոմպոզիտոր, երգերի բառերի հեղինակ Էլիաս Ռահբանին , լիբանանցի գրող Ալեքսանդր Նաջջարը , որ Ֆազլյանին գնահատել է որպես «լիբանանյան թատրոնի նահապետի» եւ Ռիֆաաթ Թարաբեյը : Երեկոն եզրափակել է Ֆազլյանի որդինՙ Հարութը , ով լիբանանյան ֆիլհարմոնիկ նվագախմբի գլխավոր դիրիժորն է: Միջոցառմանը ներկա են եղել նաեւ Ֆազլյանի կինըՙ Սիրվարդ Գրիգորյանը, եւ թոռըՙ Պերճ Ֆազլյանը: | 
