«ՆՐԱՆՔ ԻՆՁ ՄՈՒՍԹԱՖԱ ԱՆՎԱՆԵՑԻՆ» ԳԻՐՔՆ ԱՅԺՄ «Kindle-Ի» ԵՎ «Nook-Ի» ՄԻՋՈՑՈՎ Հ. Ծ. Ուոթերթաունում գործող «Օհան» հրատարակչատունը հայտնում է, որ Խաչատուր (Արչի) Փիլիպոսյանի 1999-ին լույս տեսած «Նրանք ինձ Մուսթաֆա անվանեցին: Ներգաղթյալի հուշերը» (They Called Me Mustafa: Memoir of an Immigrant) հատորն այժմ ընթերցողին հասանելի է նաեւ էլեկտրոնային տարբերակով «Amazon.com» եւ «Barnesandnoble.com» կայքերից համապատասխանաբար «Kindle» եւ «Nook» սարքերի միջոցով: Հատորը խմբագրել եւ հավելյալ տեղեկություններով հարստացրել է Հելեն Փիլիպոսյանը : Մեկնաբանություններով հանդես է եկել նաեւ ճանաչված մտավորական Երվանդ Ազատյանը : Հիշեցնենք, որ գիրքը Խաչատուրի ոդիսականն է, որին առեւանգում են քուրդերը 1915-ի Ցեղասպանության օրերին: Գերեվարությունից տարիներ անց փոքրիկին հաջողվում է փախչել եւ տեղափոխվել Ամերիկա: Հեղինակը նկարագրում է իր ծննդավայր Խարբերդը եւ Ուոթերթաունում (Մասաչուսեթս) ներգաղթյալների վաղ շրջանի կյանքը: Հետաքրքրական տեղեկություններ կան գրքում Ուոթերթաունում առաջին «Star Market-ի», որտեղ Խաչատուրը որոշ ժամանակ աշխատել է, նկարիչ Արշիլ Գորկու եւ երգիչ Ենովք Տեր-Հակոբյանի մասին: Գրքի երկրորդ մասում ներկայացված են հեղինակի պատմվածքների եւ պոեմների թարգմանությունները անգլերեն լեզվովՙ կատարված Հակոբ Սարգսյանի եւ Հելեն Փիլիպոսյանի կողմից: Ընդգրկված են նաեւ հայրենաբաղձության նկարներ: | 
