ՎԱՆ ԴԱՅՔԻ «ԱՐՇԱԼՈՒՅՍ» ՊԻԵՍԸ ՊԱՆ-ԱՍԻԱԿԱՆ ԹԱՏՐՈՆԻ ԿԱՏԱՐՄԱՄԲ Հ. Ծ. Նյու Յորքի Պան-Ասիական ռեպերտուարային թատրոնը 2018-ին ներկայացնելու է ճանաչված դրամատուրգ Ջոյս վան Դայքի «Արշալույս» (Daybreak) պիեսը: Այն մաս է կազմելու 41-րդ թատերաշրջանի խաղացանկին եւ Բեքեթ թատրոնում հանդիսատեսի դատին է հանձնվելու ապրիլի 21-ից մայիսի 13-ը ընկած ժամանակահատվածում: Բեմականացումը իրականացնելու է Լյուսի Թիպերգիենը: «Արշալույսը» ազդեցիկ պիես, է ըստ «Արմինյն Միրոր-Սփեքթեյթր» շաբաթաթերթի, որն ընդգրկում է երեք ժամանակաշրջան: Հիմնված է Ցեղասպանությունից ճողոպրած երկու ընկերուհիների իրական պատմությունների վրա: Այն ցույց է տալիս մարդկային ոգու տոկունությունը եւ համամարդկային կոչ է հղում ճանաչման եւ ապաքինման: Ջոյս վան Դայքը թատերագրություն եւ Շեքսպիր է դասավանդում Նորթիստերն ու Հարվարդ համալսարաններում: Անդամ է «MacDowell Colony» եւ «Huntington Theatre Playwriting» թատերական ընկերությունների: 2009-ին նրա «Նավթի գողը» (The Oil Thief) պիեսը, բեմականացված «Boston Playwrights՛ Theatre»-ի կողմից, արժանացել է «Էլիոթ Նորթոն» մրցանակի: Հայկական թեմայով նրա մյուսՙ «Աղջկա պատերազմը» (A Girl՛s War) պիեսը, բեմականացված երեք տարբեր թատերախմբերի կողմից, նույնպես մրցանակի է արժանացել (այս անգամ «Գասներ» մրցանակի) եւ ընդգրկվել է «Բոստոն Գլոբ» թերթի «Top Ten», տասը լավագուն պիեսների շարքում: | 
