«ՍԻՐՈ ՁԱՅՆԱՆԻՇՆԵՐ»ՙ ՍԲ. ՎԱԼԵՆՏԻՆԻ ՕՐԸ Հ.Ծ. Փետրվարի 14-ին Սբ. Վալենտինի օրվա առթիվ Պրովիդենսի (ԱՄՆ) «Ռոուդ Այլենդ քոլեջի» կատարողական արվեստի Նազարյան կենտրոնում երկու համերգ է տեղի ունենալու, որի ընթացքում հայերեն, ռուսերեն, ֆրանսերեն, իտալերեն եւ անգլերեն լեզուներով հնչելու են ռոմանտիկ երգեր, տեղեկացնում է «Արմինյն Միրոր-Սփեքթեյթր» շաբաթաթերթը: «Սիրո ձայնանիշներ» ընդհանուր խորագրի ներքո ելույթ են ունենալու աշխարհահռչակ տենոր, Մետրոպոլիտեն օպերայի աստղ Եղիշե Մանուչարյանը , մրցանակակիր սոպրանո Վիկտորիա Ավետիսյանը եւ ճանաչված դաշնակահարուհի Ջուդիթ Լին Ստիլմանը : Եղիշե Մանուչարյանը ելույթներ է ունեցել Մետրոպոլիտենում, Նյու Յորք Սիթի օպերայում եւ Կառնեգի հոլում: Վիկտորիա Ավետիսյանը Կարամուրի միջազգային երաժշտական փառատոնի եւ Վաշինգտոնի Քենեդի կենտրոնում ունեցած փառավոր ելույթների համար պարգեւատրվել է «Տարվա երիտասարդ վոկալ արվեստագետի» մրցանակով: Իսկ Ջուդիթ Ստիլմանն իր Հայոց ցեղասպանությանը նվիրված «Երբ երաժշտությունը լռեց» էպիկական ստեղծագործությամբ գլխավոր մրցանակներ է վաստակել միջազգային 4 կինոփառատոներում: | 
