ԱՐՇԻԼ ԳՈՐԿԻՆ ԱՌԱՋԻՆ ԱՆԳԱՄ ԻՏԱԼԻԱՅՈՒՄ Հ. ԾՈՒԼԻԿՅԱՆ «ARTnews-ի» հաղորդմամբ հաջորդ տարվա մայիսին Վենետիկում նախատեսվող Բիենալեի շրջանակներում ներկայացվելու են նաեւ Ամերիկայում աբստրակտ-էքսպրեսիոնիզմ նկարչական ուղղության սկզբնավորող, միջազգային ճանաչման արժանացած հայազգի մեծագույն վարպետ Արշիլ Գորկու կտավները: Լոնդոնի Թեյթ, Վաշինգտոնի Արվեստի ազգային պատկերասրահներից, Փարիզի Պոմպիդու կենտրոնից եւ այլ վայրերից, «Արշիլ Գորկի հաստատության» համագործակցությամբ ի մի բերված մոտ 80 կտավներ Վենետիկի արվեստասեր այցելուների առաջ բացահայտելու են ինքնատիպ լեզվամտածողության տեր Գորկի-արվեստագետի զարգացման յուրօրինակ ընթացքը եւ նրա ազգային պատկանելիությունըՙ սկսած վաղ շրջանի նրա փորձարարական գործերից մինչեւ հետագայի սյուրռեալիստական եւ ապա աբստրակտ-էքսպրեսիոնիստական կտավները: Ցուցահանդեսի կուրատորական պարտականությունները ստանձնելու են «Fondazione Musei Civici di Venezia-ի» տնօրեն Գաբրիելա Բելլին եւ Լոնդոնի «Royal Academy of Arts-ի» աշխատակից Էդիթ Դեվանեյը, որ 2016-ին Լոնդոնում կազմակերպել էր «Աբստրակտ-էսքպրեսիոնիզմ» ցուցահանդեսը: Վերջինս, ի դեպ, նշել է, որ ժամանակին Նյու Յորքի Արդի արվեստի թանգարանի հիմնադիր տնօրեն Ալֆրեդ Բար կրտսերը ծաղրել է Գորկու գործերը համարելով դրանք «ածանցավոր», այսինքնՙ նախկին մեծերի կրկնօրինակություններ, բայց «մենք այժմ հավաստում ենք, ավելացրել է Դեվանեյը, որ նույնիսկ այդ վաղ շրջանի կտավներում ակնհայտ են Գորկու արտիստական ինքնուրույն մտածողությունն ու ձայնը, լեզուն: Նա նոր մոտեցում էր ցուցաբերում նկարչությանը, փորձում համադրել, սինթեզել իր նախնիների գործերը եւ նոր բարձունքներ նվաճել»: |
