1920-ԱԿԱՆՆԵՐԻ ԳԵՐՄԱՆԱԿԱՆ ԿԻՆՈՆՙ ԵՐԵՎԱՆՈՒՄ Ա. Բ. Հունվարի 23-ից «Ֆիլմադարան» կինոմշակույթի զարգացման ՀԿ-ն ու Երեւանի «Գյոթե» կենտրոնը կներկայացնեն 1920-ական թվականների գերմանական կինոյին նվիրված հատուկ ծրագիր «Գյոթե» կենտրոնում (Մհեր Մկրտչյան 1): Համաշխարհային կինոյի գերմանացի մեծագույն վարպետների 5 լիամետրաժ եւ մի շարք կարճամետրաժ գլուխգործոցները կցուցադրվեն մինչեւ փետրվարի 27-ըՙ յուրաքանչյուր չորեքշաբթիՙ ժամը 19:30-ին: Հանդիսատեսը բացառիկ հնարավորություն կունենա դիտել ֆիլմեր, որոնք հատուկ այս առիթով թարգմանվել են հայերեն: Ծրագիրն ընդգրկում է Ռոբերտ Վինեի «Բժիշկ Կալիգարիի աշխատասենյակը» (1920), Ֆրիդրիխ Վիլհելմ Մուռնաուի «Վերջին մարդը» (1924), Ֆրից Լանգի «Լրտեսները» (1928), Գեորգ Վիլհելմ Փաբսթի «Պանդորայի տուփը» (1929), ավանգարդիստական կարճ ֆիլմեր (բեմադրիչներՙ Վալթեր Ռութման, Հանս Ռիխթեր, Վիքինգ Էգելինգ, Օսքար Ֆիշինգեր), Վալթեր Ռութմանի «Բեռլինՙ մեծ քաղաքի սիմֆոնիան» (1927) ֆիլմերը: Նշված կինոնկարները մեծապես ազդել են կինոարվեստի հետագա զարգացման ու կայացման վրա եւ առայսօր պահպանում են իրենց հռչակը: |
