ՄԱՏԱՂԻՍԻ ԳՈՐԾՈՎ ԴԱՏԱՎՃԻՌՆ ԱՆՓՈՓՈԽ ՄՆԱՑ ՀՀ քրեական եւ զինվորական գործերով վերաքննիչ դատարանը հրապարակեց սպանված զինծառայող Ռոման Եղիազարյանի իրավահաջորդի ներկայացուցիչ Գոհար Մելքոնյանի եւ զինվորական դատախազության վերաքննիչ բողոքով որոշումը: Դատարանը անփոփոխ թողեց Շիրակի մարզի ընդհանուր իրավասության դատարանի դեկտեմբերի 18-ի արդարացման դատավճիռը, համաձայն որի Ռոման Եղիազարյանի եւ Հովսեփ Մկրտումյանի 2003թ. սպանության մեջ մեղադրվող Ռազմիկ Սարգսյանը, Արայիկ Զալյանը, Մուսա Սերոբյանը արդարացվել էին: Ընդհանուր իրավասության դատարանը հիշյալ դատավճռով ամբաստանյալներին անմեղ էր ճանաչել ու արդարացրել կատարված հանցագործությանը նրանց մասնակցությունը ապացուցված չլինելու հիմքով: Ամբաստանյալները մեղադրվում էին ՀՀ քրեական օրենսգրքի 112-րդ հոդվածի 2-րդ մասի 1-ին, 6-րդ եւ 14-րդ կետերով երկու կամ ավելի անձանց առողջությանը ծանր վնաս պատճառելը, որն անզգուշությամբ առաջացրել է տուժողների ամբաստանյալների ծառայակիցներ Ռոման Եղիազարյանի ու Հովսեփ Մկրտումյանի մահը: | 
