«ԳՐԱԿԱՆ ԹԵՐԹՆ» ԱՐԴԵՆ ԱՌՑԱՆՑ ՏԱՐԲԵՐԱԿՈՎ Մ. Հ. Երեկ տեղի ուենցավ www.grakantert.am կայքի շնորհանդեսը: «Գրական թերթը» Հայաստանի գրողների միության պաշտոնական թերթն է, որն այժմ արդեն հասանելի է առցանց տարբերակով: Կայքը բաղկացած է արվեստանոց, գրականագիտություն եւ գրախոսություն, գրողի քաղաքական ամբիոն, երգիծանք, Էսսե, թարգմանություն, խմբագրի անկյուն, հետահայաց, հյուրասենյակ, հոբելյաններ, հրապարակախոսություն, պատմվածք, պոեզիա եւ այսպես էլ է պատահում բաժիններից: Չնայած կայքը դեռ նոր-նոր է դարձել հասանելի, սակայն ըստ շնորհանդեսի կազմակերպիչների մեծ հետաքրքրություն է նկատվում հանրության կողմից: «Գրական թերթի» պաշտոնական կայքի գաղափարը վաղուց է եղել եւ սփյուռքահայ բարերարների շնորհիվ այն կյանքի կոչվեց,- նշեց թերթի գլխավոր խմբագիր, թատերագիր Կարինե Խոդիկյանը: «Ազգի» հետ զրույցում նա ընդգծեց, որ այն հոդվածները, որոնք ծավալի պատճառով մասամբ են տպագրվում թերթում, ամբողջական տարբերակով կտեղադրվեն կայքում: Իսկ այն համարները, որոնք լույս կտեսնեն, կայքում կտեղադրվեն թերթի լույսընծայումից մեկ շաբաթ անց: Խմբագրի ցանկությունն է, որ կայքում լինեն նաեւ «Գրական թերթի» բոլոր համարները` սկսած առաջինից, ինչը մեծ աշխատանքների հետ է կապված: Բարի երթ մաղթենք կայքէջին ու նրա աշխատակազմին: | 
