ԱՐՈՆՅԱՆԸ ԳՈՐԾՆԱԿԱՆՈՒՄ ԶՐԿՎԵՑ ՈՒՂԵԳԻՐ ՆՎԱՃԵԼՈՒ ՀՆԱՐԱՎՈՐՈՒԹՅՈՒՆԻՑ Լոնդոնում ընթացող շախմատի աշխարհի չեմպիոնի տիտղոսի հավակնորդների մրցաշարի 12-րդ տուրում ուշադրության կենտրոնում էր Լեւոն Արոնյանի եւ Վլադիմիր Կրամնիկի սկզբունքային մրցավեճը, որում հաջողության հասած շախմատիստը կշարունակեր պայքարն ուղեգրի համար: Ցավոք Արոնյանը կրկին անհաջող խաղաց` կրելով 2-րդ անընդմեջ պարտությունը: Հայ գրոսմայստերը, որն ունի 6,5 միավոր, գործնականում զրկվեց 1-ին տեղը գրավելու հնարավորությունից: Իսկ ահա Կրամնիկը վաստակելով 8 միավոր, շարունակում է պայքարն ուղեգրի համար: 12-րդ տուրում առաջինն իրենց մրցավեճն ավարտեցին Գելֆանդն ու Սվիդլերը` հաշտություն կնքելով: Թերթի համարը տպագրության ուղարկելու պահին դեռեւս շարունակվում էին Կառլսեն-Իվանչուկ, Ռաջաբով-Գրիշչուկ պարտիաները: Հիշեցնենք, որ Կառլսենը 11 հնարավորից վաստակել էր 7,5 միավոր: Այսօր կայանալիք նախավերջին` 13-րդ տուրում Արոնյանը սեւերով կխաղա Գրիշչուկի հետ: Կառլսենի մրցակիցը կլինի Ռաջաբովը: Կկայանան նաեւԿրամնիկ-Գելֆանդ, Սվիդլեր-Իվանչուկ պարտիաները: | 
