ԲԵՌԼԻՆԸ ԼՈՆԴՈՆԻՑ ՊԱՐԶԱԲԱՆՈՒՄ ՊԱՀԱՆՋԵՑ ԼՐՏԵՍՄԱՆ ԱՌՆՉՈՒԹՅԱՄԲ Գերմանիայի կառավարությունը Լոնդոնին պաշտոնական հարցապնդում է ուղարկել էլեկտրոնային փոստի եւ հեռախոսազրույցների լրտեսման բրիտոնական ծրագրի կապակցությամբ, որն օրերս հայտնի էր դարձել լրատվամիջոցներին: Բեռլինի իշխանություններին մասնավորապես հետաքրքրում է, թե Գերմանիայի քաղաքացիներն արդյոք դարձե՞լ են լրտեսման օբյեկտներ: «Գարդիան» թերթը գրում է, որ Մեծ Բրիտանիայի արդարադատության եւ ներքին գործերի նախարարությանը Գերմանիայի արդարադատության նախարար Սաբինա Լոյտհոյսեր-Շնարենբերգերի հղած նամակում հարցապնդում է արվում, թե լրտեսման ծրագիրն արդյոք իրականացվել է դատարանի՞ թույլտվությամբ եւ ունի՞ արդյոք օրենսդրական հիմք: Բացի դրանից, գերմանացի նախարարին հետաքրքրում էՙ ծրագիրն օգտագործվում է կոնկրետ տեղեկություններ ստանալո՞ւ համար, թե՞ ավելի լայն ընդգրկում ունի: «Գերմանիայի ձայն» ռադիոկայանի տվյալներով, ավելի վաղՙ հունիսի 24-ին, Գերմանիայի կառավարությունը պարզաբանումների համար դիմել էր Բեռլինում Մեծ Բրիտանիայի դեսպանությանը: Առաջին անգամը չէ, որ գերմանացի իշխանավորները քննադատում են բրիտանական հատուկ ծառայությունների Tempora ծրագիրը: Դրա կապակցությամբ ավելի վաղ հիասթափություն էր արտահայտել կանցլեր Անգելա Մերկելը, իսկ արդարադատության նախարարը այն անվանել էր «հոլիվուդյան մղձավանջ»: Իրենց հերթին բրիտանացի իրավապաշտպանները պահանջում են պաշտոնական քննություն անցկացնել ծրագրի բացահայտման կապակցությամբ: Հունիսի 25-ին Liberty իրավապաշտպանական կազմակերպությունը համապատասխան հարցում ուղարկեց հատուկ տրիբունալ: Կազմակերպությունը պահանջում է գնահատել, թե Tempora-ն չի՞ խախտում արդյոք քաղաքացիների մասնավոր կյանքի իրավունքը եւ թղթակցության անձեռնմխելիությունը: Կառավարական կապի բրիտանական կենտրոնի (GCHQ) Tempora ծրագրին վերաբերող նյութը հունիսի 22-ին հրապարակել էր «Գարդիան» թերթըՙ վկայակոչելով ԿՀՎ եւ ԱԱԳ նախկին աշխատակից Էդվարդ Սնոուդենին: Հրապարակված նյութի համաձայն, հատուկ ծառայությունը անդրատլանտյան մալուխներն է միացրել մասնավոր հեռախոսազրույցներին, էլեկտրոնային նամակագրությանը եւ սոցիալական ցանցերի հաղորդումներին հետեւելու եւ ստացված տեղեկությունների ԱՄՆ-ի հետ փոխանակելու նպատակով: | 
