ՀԵՆՐԻԽ ՄԽԻԹԱՐՅԱՆԸ ՄՈՏ Է «ԼԻՎԵՐՊՈՒԼ» ՏԵՂԱՓՈԽՎԵԼՈՒՆ Դորտմունդի «Բորուսիան» միացավ նրա համար պայքարին Հենրիխ Մխիթարյանի տրանսֆերի հարցը շարունակում է մնալ լրատվամիջոցների ուշադրության կենտրոնում: Երեկ երեկոյան ԼՁԸՀ-ՁԸհհ-ը հաղորդագրություն տարածեց, որ Հենրիխ Մխիթարյանը գտնվում է Լոնդոնում: Այդ մասին գործակալության թղթակցին հայտնել են այն հյուրանոցի աշխատակիցները, որում հանգրվանել է Հենրիխը: Իսկ 101greatgoals.com-ը կայքում տեղադրել է Հենրիխի լուսանկարը հյուրանոցում: Լոնդոնից Մխիթարյանը մեկնելու է Լիվերպուլ, որտեղ էլ ենթադրվում է, որ կկայանա երկար սպասված գործարքը: Իսկ մինչ այդ ըստ գերմանական «Բիլդի» հայ ֆուտբոլիստին իր կազմում ցանկանում է ընդգրկել Դորտմունդի «Բորուսիան», որը պատրաստ է «Շախտյորին» 25 մլն եվրո վճարել: «Բիլդը» չի բացառել, որ «Բորուսիայի» ղեկավարությունը բանակցում է Մխիթարյանի հետ: Թիմի գլխավոր մարզիչ Յուրգեն Կլոպը Մխիթարյանին դիտարկում է որպես Մարիո Գյոտցեի փոխարինող, որը տեղափոխվել է Մյունխենի «Բավարիա»: Իսկ ահա ուկրաինական «Взгляд»-ի թղթակցի կարծիքով, Մխիթարյանի շուրջը ներկայումս ստեղծված իրավիճակը կարող է ուկրաինական ֆուտբոլի ամենաաղմկահարույց պատմություններից մեկը դառնալ: Մխիթարյանը պետք է հունիսի 23-ին միանար Ավստրիայում ուսումնամարզական հավաք անցկացնող «Շախտյորին»: Սակայն նա Երեւանից մեկնեց Փարիզ: «Շախտյորի» գլխավոր տնօրեն Սերգեյ Պալկինն էլ սպառնացել էր, որ եթե Մխիթարյանը մոտ օրերս չմիանա թիմակիցներին, ապա խոշոր տուգանքի կենթարկվի: «Взгляд»-ի թղթակիցը խնդրել է ստեղծված իրավիճակը մեկնաբանել ֆուտբոլային հայտնի գործակալ Դմիտրի Սելյուկին, որը մինչ այդ զբաղվում էր Մխիթարյանի տրանսֆերային գործերով: «Վերջին շրջանում այլեւս չեմ աշխատում Հենրիխի հետ: Նա շատ խորհրդականներ ունի: Գուցե հենց նրանցից մեկն էլ համոզել է Հենրիխին, որ նա չհամագործակցի ինձ հետ: Որքան ինձ է հայտնի, Մխիթարյանին նույնիսկ արգելել են շփվելու ինձ հետ: Ես կռահում եմ, թե ով է ապակողմնորոշում Մխիթարյանին: Դա իտալացի գործակալ Մինո Ռայոլան է: Կարծում եմ, որ հենց նրա դրդմամբ է Հենրիխը որոշել կոնֆլիկտի մեջ մտնել «Շախտյորի» հետ: Ի՞նչ հույսեր ունեն նրանք: Հավանաբար ցանկանում են այդ կերպ «Շախտյորին» ստիպել, որ Մխիթարյանին բաց թողնի «Լիվերպուլ»: Սերգեյ Պալկինն ասում է, որ «Լիվերպուլը» կապ չի՞ հաստատել «Շախտյորի» հետ: Չգիտեմ, ես այլ տեղեկատվություն ունեմ: Իսկ ընդհանրապես կարող է իրավիճակն այնպես փոփոխվել, որ Մխիթարյանն ու Ռայոլան զղջան, որ «Շախտյորի» հետ նման խաղեր են խաղացել», նշել է Դմիտրի Սելյուկը: Իրոք որ չպետք է խախտել խաղային կարգապահությունը: «Շախտյորի» ֆուտբոլիստներն արդեն սկսել են մարզումներն ու ստուգողական հանդիպումներ են անցկացրել Ավստրիայում, այժմ էլ մասնակցելու են «Սպարտակի» եւ «Զենիթի» հետ նախատեսված մրցախաղերին: Հավաքից հետ ընկնելը կարող է բացասաբար անդրադառնալ Մխիթարյանի մարզավիճակի վրա: Իսկ ամենանբաղձալին կլինի այն, եթե «Շախտյորը» կարգապահական եւ դրամական տույժեր կիրառի Հենրիխի հանդեպ: Մեզ հայտնի չեն ակումբի հետ Հենրիխի պայմանագրի կետերը: «Շախտյորի» գլխավոր մարզիչ Միրչա Լուչեսկուն ժամանակին հայտարարել էր, որ հայ ֆուտբոլիստի տրանսֆերային արժեքն ակումբը սահմանել է 30 մլն եվրո: Սակայն հայտնի չէ, թե ինչպես է ձեւակերպված պայմանագրի այդ կետը: Նշված գումարի վճարման դեպքում ակումբը պարտավո՞ր է ֆուտբոլիստի համաձայնությամբ նրան թույլատրել տեղափոխվելու այլ թիմ, թե՞ ակումբն իր հայեցողությամբ է որոշելու այդ հարցը: Ամեն դեպքում, յուրաքանչյուր քայլ կատարելիս Հենրիխ Մխիթարյանը պետք է շատ զգույշ լինի, որպեսզի ստեղծված խառնաշփոթ իրավիճակում չտուժի: | 
