ՍԱՀՄԱՆԱԴՐԱԿԱՆ ՓՈՓՈԽՈՒԹՅՈՒՆՆԵՐ` ՈՒՄ ՀԱԳՈ՞Վ ՄԱՐԻԵՏԱ ԽԱՉԱՏՐՅԱՆ Հետաքրքական է, որ երբ հասարակությունը սպասում է նոր վարչապետի անունին, Հայաստանի նախագահին կից Սահմանադրական բարեփոխումների հանձնաժողովը երեկ հրապարակում է սահմանադրական բարեփոխումների հայեցակարգի նախագիծը, որտեղ հեղափոխական փոփոխություններ են նախատեսվում Հայաստանի կառավարման համակարգում: Այսպես, ըստ այդ նախագծի` Հայաստանի նախագահին ընտրում է Ազգային ժողովը յոթ տարի ժամանակով, առանց վերընտրվելու իրավունքի, ընդ որում` թեկնածուները պետք է լինեն ոչ կուսակցական: Ու նրա պարտականությունների մեջ է մտնում ոչ թե ասենք գործադիրի ղեկավարումը, կամ ընթացիկ քաղաքական գործընթացներին խառնվելը, այլ ընդհակառակը` պետք է հետեւի Սահմանադրության պահպանմանը. Սահմանադրությամբ նախատեսված իշխանական գործառույթների գործադրմանը, այն է` իշխանության զսպող եւ հակակշռող մեխանիզմների լիարժեք կիրառմանը, դառնալով համակարգային կայունության պահպանման երաշխավորը: Վարչապետը, որին խորհրդարանական ընտրությունների արդյունքում ձեւավորված Ազգային ժողովն է նշանակում, ընդ որում` նա կարող է լինել մեծամասնություն կազմած կուսակցության ղեկավարը, պատասխանատու է նույն Ազգային ժողովին, եւ կառավարության գործունեության վերահսկման պատասխանատուն էլ Ազգային ժողովն է: Այսինքն` խորհրդարանի քաղաքական դերն այսպիսով լավ բարձանալու է, երկրի նախագահին այս իմաստով միայն դիտորդի կարգավիճակ է հատկացված` հետեւելու է, որ ամեն ինչ Սահմանադրության շրջանակում տեղի ունենա: Փափկացվում է նաեւ ընտրական համակարգը` առավել կայուն ընտրական համակարգի մանրամասներ ամրագրելով բուն Սահմանադրության մեջ եւ շատ բան որոշելու տեղ չթողնելով կուսակցապետերին` ընտրական համակարգի երկբեւեռության խթանման ներուժ դնելով փոփոխություններում: Հետաքրքրական է, թե ում սիլուետներն են հետապնդել հանձնաժողովականներին այս փոփոխությունները նախատեսելիս, երեքի էլ` նախագահի, վարչապետի եւ ԱԺ նախագահի լիազորությունները սահմանելիս: Այս նախագիծը երեկ ներկայացվել է Հայաստանի նախագահին, նախագահն իր կողմից կարեւորել է այդ նախագծի հանրային քննարկումները` ճիշտ կառավարման մոդել ընտրելու առումով, եւ քննարկումների փուլն սկսելուց առաջ հայտարարել.«Ես, Սերժ Սարգսյանս, այլեւս երբեք չեմ առաջադրվելու ՀՀ նախագահի պաշտոնի համար: Եթե վերջնական քննարկումների արդյունքում իմ ցանկությանը չհամապատասխանող ուղի ընտրվի, նկատի ունեմ պառլամենտական կառավարման մոդելը, ապա ես չեմ հավակնի նաեւ վարչապետի պաշտոնին», ասել է նա: |
