ԱՐԹՈՒՐ ԱԼԵՔՍԱՆՅԱՆԸ` ԵՎՐՈՊԱՅԻ ԵՌԱԿԻ ՉԵՄՊԻՈՆ Հունահռոմեական ոճի ըմբիշ Արթուր Ալեքսանյանը երրորդ անգամ նվաճեց Եվրոպայի չեմպիոնի կոչումը: Ֆինլանդիայի Վանտաա քաղաքում ապրիլի 5-ին եւ 6¬ին կայացավ հունահռոմեական ոճի ըմբշամարտի Եվրոպայի առաջնությունը: 98 կգ քաշային կարգում Հայաստանի հավաքականի ըմբիշ Արթուր Ալեքսանյանը պայքարի մեջ մտավ 1/16 եզրափակիչից: Հայ ըմբիշը առանց միավոր կորցնելու հաղթահարեց բոլոր մրցակիցների արգելքը: Եզրափակիչում Արթուրը 5:0 հաշվով հաղթեց թուրք ըմբիշին եւ Վանտաայում հնչեց Հայաստանի օրհներգը: 22-ամյա ըմբիշը հաղթանակը նվիրեց հավաքականի գլխավոր մարզչին: Լեւոն Ջուլֆալակյանը նշում էր ծննդյան 50-րդ տարեդարձը: Հունահռոմեական ոճի ըմբշամարտի Եվրոպայի առաջնությունից ձեռնունայն չվերադարձավ նաեւ Լոնդոնի Օլիմպիական խաղերի արծաթե մեդալակիր Արսեն Ջուլֆալակյանը: Արսենը դարձավ Եվրոպայի փոխչեմպիոն: 75 կգ քաշայիննների եզրափակիչում Ջուլֆալակյանը մեկ միավորի տարբերությամբ զիջեց ռուս Ալեքսանդր Չեկիրկինին (3:4): Ըստ հայր Ջուլֆալակյանի, մեր տղաները մարտական էին տրամադրված, լուրջ եւ կայացած թիմ ունենք. «Շատ ուրախացա, երբ Արթուր Ալեքսանյանը հաղթանակն ինձ նվիրեց: Արսենն էլ էր ցանկանում ոսկե մեդալով շնորհավորել, սակայն մի պահ զգոնությունը կորցրեց: Կարող էինք 4-5 մեդալ նվաճել, սակայն տակտիկանան սխալներ եւ մրցավարական սայթաքումներ եղան: Չգիտեմ ինչպես որակավորեմ` սայթաքում, թե դիտավորություն»: Նշեք, որ Հայաստանը ներկայացնող մյուս ըմբիշները մեդալներ չեն նվաճել, իսկ հավաքական թիմը զբաղեցրել է 7-րդ տեղը: | 
