ՍՊԻՐՏԻ ԱՐՏԱԴՐՈՒԹՅԱՆ ՆՈՐ ՁԵՌՆԱՐԿՈՒԹՅԱՆ ՀԱՄԱՐ ԱԱՀ-Ն ԿՀԵՏԱՁԳՎԻ Ա. Մ. «Ա եւ Գ» ընկերության ներդրումային ծրագրի իրագործման արդյունքում կստեղծվի մոտ 40 աշխատատեղ` 110 հազար դրամ միջին աշխատավարձով: Ընկերությունը, սպիրտի արտադրության տեխնոլոգիական պրոցեսների արդյունավետությունը եւ թողարկվող սպիրտի քանակն ավելացնելու եւ որակը բարձրացնելու նպատակով, Երեւանի Արշակունյաց 127/21 հասցեում նախատեսում է տեղադրել նոր` իտալական արտադրության ժամանակակից սարքավորումներ: Այդ նպատակով կառավարությունը վաղվա նիստում հետաձգեց ընկերության կողմից 1,3 մլրդ դրամի ներդրումներ նախատեսող ապրանքների ներմուծման դեպքում ավելացված արժեքի հարկի վճարման ժամկետը: Վերոնշյալ ներդրումների շնորհիվ հնարավոր կլինի ներդնել իտալական արտադրությամբ ժամանակակից սարքավորումներ, ինչի միջոցով ընկերությունը նախատեսում է եկող տարի արտադրել տարեկան շուրջ 20 մլրդ դրամի արտադրանք, որի շուրջ 25 տոկոսը կարտահանվի ՌԴ, Իրաք եւ Վրաստան: Ըստ որոշ տեղեկությունների, «Ա եւ Գ» ընկերությունը պատկանում է ԱԺ պատգամավոր Սամվել Ալեքսանյանին: | 
