ՎԻՎԱՍԵԼ-ՄՏՍ-Ի ԱՇԽԱՏԱԿԱԶՄԻ ԿԱՄԱՎՈՐԱԿԱՆ ՆԱԽԱՁԵՌՆՈՒԹՅՈՒՆՆԵՐԸ ՇԱՐՈՒՆԱԿԱԿԱՆ ԵՆ. ԻՐԱԿԱՆՈՒԹՅՈՒՆ ԵՆ ԴԱՌՆՈՒՄ 6 ԵՐԵԽԱՆԵՐԻ ԵՐԱԶԱՆՔՆԵՐԸ շխարհի բազմաթիվ երկրների կենդանաբանական այգիներ տարվա մեջ մեկ օր հատուկ կարիքներով եւ առողջական խնդիրներով երեխաների են հրավիրում` ընդունելով նրանց որպես հատուկ կարեւորության հյուրերի: «Երազանքի գիշեր կենդանաբանական այգում»` այսպես է կոչվում համաշխարհային նախաձեռնությունը, որին միացել են Նիդերլանդների, Գերմանիայի, Ճապոնիայի, ԱՄՆ-ի, Կանադայի եւ տասնյակ այլ երկրների կենդանաբանական այգիները: Այս տարի հունիսին Երեւանի կենդանաբանական այգին նույնպես անցկացրեց «Երազանքի գիշեր» գունեղ միջոցառումը` հյուրընկալելով ավելի քան 60 երեխաների իրենց ընտանիքների հետ: ՎիվաՍել-ՄՏՍ-ի անձնակազմը չէր կարող անմասն մնալ. հանգանակված ավելի քան մեկ միլիոն դրամի շնորհիվ հնարավոր դարձավ իրականացնել երեխաներից 6-ի երազանքները: Առողջական տարբեր խնդիրներով երեխաների օրն անմոռանալի դարձնելու համար այգում նախապատրաստվել էր թատերական, երաժշտական ու խաղային ծրագիր, հյուրասիրություն: Փոքրիկ հյուրերը հատուկ իրենց համար մշակված շրջայց կատարեցին կենդանաբանական այգում` անմիջականորեն շփվելով կենդանիների եւ դրանց խնամողների հետ: Միջոցառմանն ընդառաջ կազմակերպիչները պարզել էին հրավիրված յուրաքանչյուր երեխայի երազանքը կամ կարիքը: «Երազանքի գիշերվան» նախորդած շուրջ մեկ ամսվա ընթացքում ընդարձակ քարոզարշավ անցկացվեց, որի ընթացքում բազմաթիվ անհատներ ու կազմակերպություններ դարձան մեկ կամ մի քանի երեխայի երազանքների իրականացման հովանավորներ: Հունիսի 28-ինՙ օրվա վերջում երեխաներին հանձնվեցին «Երազանքի իրականացման հավաստագրեր» եւ նվեր-փաթեթներ: «Երազանքի իրականացման հավաստագրերը» փոքրիկներին խոստացան, որ իրենց երազանքները կիրականացվեն մինչեւ ընթացիկ տարվա վերջ: «Երազանքի գիշեր Երեւանի կենդանաբանական այգում» նախաձեռնությունն իրականացրեց Վայրի բնության եւ մշակութային արժեքների պահպանման հիմնադրամը: | 
