ԷԲՈԼԱՅԻ ԴԵՄ ԿԻՐԱՌՎՈՒՄ ԵՆ ՆՈՒՅՆԻՍԿ ՉՓՈՐՁԱՐԿՎԱԾ ՊԱՏՎԱՍՏԱՆՅՈՒԹԵՐ Պ. Ք. Հայաստանում «Ազգը» առաջին լրատվամիջոցն էր, որ 2014 թ. մարտի սկզբներին պատմեց Արեւմտյան Աֆրիկայում սկսված Էբոլա տենդի վտանգների մասին: Թերթը հետագայում եւս անդրադարձավ այդ հիվանդության համաճարակային բնույթին, մասնավորապես նշելով, որ դրա բուժման միջոցներ առայժմ գոյություն չունեն: Այդ վիրուսով ախտահարվելու դեպքում մահանալու հավանականությունը հասնում է 90 տոկոսի: Պատահական չէ, որ մարդկանց վրա զանազան պատվաստանյութերի երկարատեւ փորձարկումների արդյունքներին չսպասելովՙ Առողջապահության համաշխարհային կազմակերպությունը թույլատրել է հիվանդներին բուժել փորձնական պատվաստանյութերով: Համաճարակը ներկայումս մոլեգնում է Լիբերիայում, Գվինեայում, Սիեռա Լեոնեում եւ Նիգերիայում: Միայն Լիբերիայում, ԻՏԱՌ-ՏԱՍՍ գործակալության տվյալներով, Էբոլայի վիրուսով ախտահարված 466 մարդ է մահացել: Արեւմտյան Աֆրիկայում զոհերի թիվ 1229 է եւ շարունակում է աճել: Ախտահարված անձանց թիվը առնվազն 2240 է: «Ազգ»ը օգոստոսի 1-ի համարում գրեց, որ Էբոլայից պաշտպանվելը չափազանց դժվար է, եւ որ ախտահարված բժիշկների եւ ճանապարհորդների միջոցով վիրուսի տարածման վտանգը արդեն իսկ առկա է ԱՄՆ-ում, Մեծ Բրիտանիայում, Հոնկոնգում եւ մի քանի այլ երկրներում: Օգոստոսի 20-ին Լիբերիայի պետական ռադիոն հաղորդեց, որ երկրում պարետային ժամ է հաստատվել համաճարակի պայմաններում բնակչության տեղաշարժը վերահսկելու նպատակով: Ավելի վաղՙ հուլիսի 31-ին, արտակարգ դրություն էր հայտարարվել Սիեռա Լեոնեում, օգոստոսի 8-ինՙ Նիգերիայում, օգոստոսի 13-ինՙ Գվինեայում: |
