ԷԿՎԱԴՈՐՆ ԱՊԱՍՏԱՆ ՏՐԱՄԱԴՐԵՑ ԱՍԱՆԺԻՆ Պ. Ք. Էկվադորի նախագահ Ռաֆայել Կոռեան օգոստոսի 20-ին Գվատեմալա կատարած այցելության ժամանակ հաստատել է, որ իր երկիրը Լոնդոնում իր դեսպանատան շենքում ապաստան է տրամադրել արդեն երկու տարի այնտեղ գտնվող WikiLeaks կայքէջի հիմնադիր Ջուլիան Ասանժին: Կոռեայի խոսքերովՙ դա արվել է պատշաճ իրավական արարողակարգի բացակայության կապակցությամբ Ասանժի կյանքին սպառնացող վտանգի պատճառով, նշում է Notimex գործակալությունը: Կոռեան միաժամանակ ընդգծել է, որ Ասանժի ճակատագիրը Մեծ Բրիտանիայի ձեռքին է, որը կարող է երկրից ազատորեն հեռանալու հնարավորություն տալ նրան: Ասանժի փաստաբան Ջենիֆեր Ռոբինսոնը նախօրեին Ավստրալիայի հեռուստատեսությանը տված հարցազրույցում հայտարարել էր, որ Ասանժը չի հեռանա Լոնդոնում Էկվադորի դեսպանատնից, քանի դեռ երաշխիք չի ստացել, որ իրեն չեն արտահանձնի ԱՄՆ-ին, որտեղ կարող է ցմահ բանտարկվել պետական գաղտնիքների հրապարակման մեղադրանքով: Ռոբինսոնի խոսքերովՙ երկու տարի փակ տարածքում մնալու հետեւանքով Ասանժի առողջական վիճակը վատացել է. նա տառապում է սրտի անկանոն աշխատանքից, բարձր ճնշումից եւ հազի նոպաներից: | 
