ՖՐԱՆՑԻՍԿՈՍ ՊԱՊԸ ԿՀՅՈՒՐԸՆԿԱԼԻ ՊՈՒՏԻՆԻՆ ԱՆԱՀԻՏ ՀՈՎՍԵՓՅԱՆ, Գերմանիա Պուտինն առաջիկա շաբաթ հանդիպելու է Հռոմի պապին, տեղեկացնում է գերմանական dpa գործակալությունըՙ վկայակոչելով Վատիկանի հաստատումըՙ Ֆրանցիսկոս պապն ընդունելու է Ռուսաստանի նախագահին չորեքշաբթիՙ հունիսի 10-ին: Սա ուկրաինական հակամարտությունից հետո նրանց առաջին հանդիպումն է, վերջինը կայացել էր 2013-ի նոյեմբերին, երբ Սիրիայում արյունալի քաղաքացիական պատերազմը դիվանագիտական ուղիներով հանգուցալուծելու ջանք էր գործադրվում: Ուկրաինայի արեւելքում մեկ տարուց ավելի է կառավարական զորքերը մարտնչում են ռուսամետ ուժերի դեմ, ՄԱԿ-ի տվյալներով զոհերի թիվն անցնում է 6400- ից, մեկ միլիոնից ավելին գաղթական են դարձել: Վատիկանը ցայժմ հակամարտության հանդեպ միայն վերապահ հայտարարություններով է հանդես եկելՙ Հռոմի պապը զգուշացրել է, որ սա «քրիստոնյաների միջեւ ընթացող պատերազմ է»: Այնինչ Ուկրաինայում ուղղափառ քրիստոնյաների մեջ Հռոմին հարող փոքրաթիվ կաթոլիկները Վատիկանից պահանջում են հակամարտության մեջ ռուսական գծի հստակ դատապարտում: |
