DWN. 2008 Թ. ՏՆՏԵՍԱԿԱՆ ԱՆԿՈՒՄԸ ԿԱՐՈՂ Է ԿՐԿՆՎԵԼ Պ. Ք. 2016 թվականի սկիզբը աշխարհի ֆինանսական շուկաների համար վատթարագույնն էր վերջին տասնամյակների ընթացքում: Շատ հավանական է, որ համաշխարհային տնտեսության մեջ արձանագրվի անկում, որը իր ընդգրկմամբ համեմատելի կլինի 2008 թ. ճգնաժամի հետ, գրում է գերմանական Deutsche Witschafts Nachrichten (DWN) թերթը: Հոդվածագիր Միխայել Բեռնեգգերը նշում է, որ համաշխարհային տնտեսության աճի խոչընդոտներից մեկը ուժեղ դոլարն է, որը զգալիորեն նվազեցնում է ամերիկյան կորպորացիաների շահույթը: Ըստ որում, ԱՄՆ դաշնային բանկի արժութային քաղաքականության նախատեսվող խստացումը նույնպես դառնում է ֆոնդային շուկայի անկման պատճառ: Բեռնեգգերը ավելացնում է, որ տվյալ պայմաններում Չինաստանում արժութային կարգավորիչն իրականացնում է «խրթին շուկայական միջամտություններ», որոնք սպառնում են ՉԺՀ տնտեսության «կոշտ վայրէջքով»: Ինչ վերաբերում է ճգնաժամի ֆինանսական նախադրյալին, դա նավթի գների փլուզումն է էներգակիրների համընդհանուր գերարտադրության հետեւանքով: Այդ բոլոր գործոնները ստեղծում են տնտեսական անկման պայմանները, որի ծավալները համադրելի են 2008 թ. ճգնաժամի հետ: Իսկ եթե հաշվի առնենք իրադարձությունների հետագա զարգացման անկանխատեսելիությունը, ապա նոր ճգնաժամը կարող է լինել նախորդից շատ ավելի ուժեղ, նշում է DWN-ը: | 
