«ԴՎԻՆԸ» ԿԴԱՌՆԱ «ԼՅՈՒՔՍ» ԴԱՍԻ ՀՅՈՒՐԱՆՈՑ ԵՎ ԿՎԵՐԱՆՎԱՆՎԻ «ԴԱՎԻԹ ԲԵԿ» Ա. Մ. «Սի Սի Ջի Կովկասյան կոմունիկացիոն խումբ» ընկերության կողմից «Դվին» հյուրանոցային համալիրի վերակառուցման ներդրումային ծրագրի վերջնաժամկետը կերկարացվի մինչեւ 2019 թվականը: Կառավարության երեկ ընդունած որոշման համաձայն, ներդրումների ընդհանուր գումարը կկազմի մոտավորապես 120 մլն դոլար, կկառուցվի միջազգային չափանիշներին համապատասխանող հյուրանոցային համալիր, կստեղծվի 400 նոր աշխատատեղ: Վարչապետ Հովիկ Աբրահամյանը իր համաձայնությունը հայտնեց ներդրումային ծրագրին, պայմանով, որ պայմանագրով պետք է ամրագրվի յուրաքանչյուր տարվա համար նախատեսվող ներդրումների մեծությունը, նշված ներդրումներն արտացոլի Ֆինանսական հաշվետվությունների միջազգային ստանդարտներին համապատասխան կազմված հաշվետվություններում (IFRS), որոնք պետք է ենթարկվեն արտաքին աուդիտի, իսկ աուդիտորական եզրակացությունը ներկայացվի կառավարությանն առընթեր պետական գույքի կառավարման վարչություն: Հարցը ներկայացնող պետգույքի կառավարման վարչության պետ Արման Սահակյանի տեղեկացմամբ, այս տարվա ընթացքում կկատարվի մոտ 20 մլն դոլարի ներդրում: Ըստ վարչության պետի, «Դվին» հյուրանոցային համալիրի վերակառուցումն իրականացվում է «լյուքս» դասի հինգաստղանի հյուրանոցների միջազգային չափանիշներին համապատասխան: Բացի այդ, հյուրանոցային համալիրը ներառելու է նաեւ այլ կառույցներ, մասնավորապես առանձին «Բնակելի բազմաֆունկցիոնալ համալիր» («Apartments Plaza»), որը կներկայացնի իրենից բարձրահարկ մասնաշենք, որտեղ գտնվելու են առնվազն 60 «լյուքս» դասի բնակարաններ: «Բնակելի բազմաֆունկցիոնալ համալիր»-ի («Apartments Plaza»-ի) վերեւի հարկում նախատեսվում է ունենալ հարթակ ուղղաթիռի համար: Նախատեսվում է հյուրանոցային համալիրի ռեբրենդինգ եւ նրա վերանվանումՙ «Դավիթ Բեկ» հյուրանոցի», նշեց Արման Սահակյանը: |
