ԱՅՔԱԶՅԱՆ ԱՐՔԵՊԻՍԿՈՊՈՍԸ ԱՅՑԵԼԵԼ Է ԻՐԱՔ Հ. Ծ. «Մարդիկ հուսահատ վիճակում են: Մտածեցի, որ 1915 թվականն է եւ ես քայլում եմ Սիրիայի, Բեյրութի, Հունաստանի կամ Կիպրոսի փախստականների ճամբարներից մեկի միջով: Նույն հուսահատ դեմքերն էին, միայն թե հարյուր տարի անց: Մի քրիստոնյա կնոջ հարցրեցի, թե ինչո՞վ կարող ենք օգտակար լինել, նյութականո՞վ, եկեղեցի կառուցելո՞վ, թե՞... պատասխանը քար կտրեց ինձ: «Ես քայլում եմ, բայց մեռած մարդ եմ: Դուք տեսնում եք մարմինս, որը դատարկ է: Ես կորցրել եմ ինքնությունս: Կարո՞ղ եք վերադարձնել ինքնությունս», ասաց նա: Տառապանքը, որին ականատես եղանքՙ անսահման է: Քրիստոնյաների թիվը անընդհատ նվազում է Իրաքում: Տասը տարի հետո ոչ մի քրիստոնյա չի մնալու այս երկրում: Մեկ միլիոն յոթհարյուր հազար քրիստոնյաներից (2003 թ.) այժմ ընդամենը 250 հազարն է մնացել, իսկ հայերի թիվը երբեմնի 40 հազարից նվազել է 7 հազարի», նշել է Վիգեն արք. Այքազյանը , ով վերջերս եկեղեցիների համաշխարհային խորհրդի (WCC) անդամների ուղեկցությամբ այցելել է Իրաք եւ հանդիպել տեղի քաղաքական առաջնորդների, ՄԱԿ-ի ներկայացուցիչների, մարդասիրական ծառայություններ մատուցողների եւ գաղթականների հետ Բաղդադում եւ Քուրդիստանում: Ուղեւորությունը կազմակերպված է եղել ԵՀԽ-ի կողմից, որի գլխավոր քարտուղար պատվելի դոկտ. Օլաֆ Ֆիքսե Տվեյթը այցելությունը չափազանց կարեւոր է համարել: «Ոչ միայն նրա համար, որ լսենք նրանց, այլ հատկապես ցույց տալու համար, որ մենք զորակցում եւ փորձում ենք աջակցել նրանց», նշել է նա: Այցելության ընթացքում պատվիրակությանը մեծապես աջակցել է Իրաքի Հայոց թեմի առաջնորդ Ավագ արք. Ասատուրյանը, որի ջանքերը գերազանց է գնահատել Այքազյան սրբազանը: Պատվիրակությունը հանդիպումներ է ունեցել Իրաքի վարչապետ Հեյդար էլ-Աբադիի, նախագահ Ֆուադ Մասումի եւ Քուրդիստանի փոխվարչապետ Քուբադ Թալաբանիի հետ: «Էրբիլը համեմատաբար շատ ավելի ապահով վայր է», եզրակացրել են պատվիրակության անդամները: Նկար 1. Վիգեն արք. Այքազյան |
