ՍԵՆԱՏԸ ԸՆԴՈՒՆԵԼ Է ՀԱՅ ԴԱՏԻ ԳՐԱՍԵՆՅԱԿԻ ԱՌԱՋԱՐԿՆԵՐԸ Հ. Ծ. Ըստ Ամերիկայի Հայ դատի կոմիտեից ստացված հաղորդագրության, Սենատի ֆինանսական հատկացումների հանձնախմբի լիագումար նիստը սեպտեմբերի 7-ին ընդունել է ANCA-իՙ Հայ դատի գրասենյակի ներկայացրած մի շարք բանաձեւերը ի նպաստ Հայաստանի եւ Արցախի: Սենատը նաեւ Թուրքիայի եւ Ադրբեջանի նկատմամբ սանկցիաներ կիրառելու որոշում է կայացրել, սահմանափակելով ճանապարհորդություններն ու զենքի վաճառքը այդ երկրներին: «Կոնգրեսը հստակ շրջադարձ է կատարում այդ երկու երկրների նկատմամբ իր քաղաքականության մեջ», նշել է այդ առթիվ Հայ դատի գրասենյակի գործադիր տնօրեն Արամ Համբարյանը : Սենատի արտաքին օժանդակության բանաձեւի զեկույցում օրենսդրական մանրամասն ուղղություն է տրված գործադիր իշխանություններին շարունակելու օժանդակությունը Լեռնային Ղարաբաղին եւ հակամարտությունը լուծելու բացառապես խաղաղ ճանապարհով: Գալով Հայաստանին, հանձնախումբը կոչ է արել մոտ 14 միլիոն դոլարով ավելացնել նախագահի առաջարկած բյուջեն: 17,633 միլիոն դոլար հատկացնել Տնտեսական զարգացման հիմնադրամին, 1,5 միլիոն դոլար հատկացնել թրաֆիքինգի դեմ պայքարին, 600 հազարՙ միջազգային զինվորական կրթության եւ վերապատրաստման եւ 1 միլիոնՙ ռազմական ֆինանսավորմանը: Երեք գլխավոր փոփոխությունների հիմք են ծառայել Թուրքիայի եւ Ադրբեջանի հակաժողովրդավարական գործընթացները եւ մարդու իրավունքների կոպիտ խախտումները: Դրանց մասին արտահայտվել են սենատորներ Քրիս վան Հոլենը (դեմոկրատ), Ջեյմս Լանկֆորդը (հանրապետական), Ջին Շահինը (դեմոկրատ) եւ Դիք Դուրբինը (դեմոկրատ): Նրանք մասնավորապես կոչ են արել ազատ արձակել ապօրինաբար բանտարկված պաստոր Էնդրու Բրանսոնին (բնիկ Հյուսիսային Կարոլինայից), որ ավելի քան 2 տասնամյակ հոգեւոր հովիվն է եղել Իզմիրի Սբ. Հարության եկեղեցում, եւ Ադրբեջանում «Թուրան» անկախ լրատվամիջոցի տնօրեն Մեհման Ալիեւին: | 
