ԼԱՊՇԻՆԻ ՀԵՏԵՎԻՑ ԵԿԵԼ ԷՐ ՄԱՅՐԸ ՀՈՎԻԿ ԱՖՅԱՆ Բլոգեր Ալեքսանդր Լապշինն արդեն Իսրայելում է: Հիշեցնենք, որ Իլհամ Ալիեւը օրերս ներում շնորհեց Լապշինին, ով դատապարտվել էրՙ «Ադրբեջանի տարածքն ապօրինաբար հատելու համար»: Ուշագրավ է, որ բլոգերի հետեւից Բաքու էր ժամանել նրա մայրը: Հավանաբար Իլհամ Ալիեւը չի ցանկացել Լապշինին բաց թողնելՙ առանց ծնողների: Լապշինի փաստաբանը տեղեկացրել է, որ բլոգերն ու նրա մայրը Բաքվից կմեկնեն Թուրքիա, հետո այնտեղից նորՙ Իսրայել: Թե ինչո՞ւ է Բաքվիցՙ Իսրայել ճանապարհն ընկած Թուրքիայով, փաստաբանը չի մանրամասնել, հավանաբար Լապշինը պետք է Թուրքիայից էլ ներողություն խնդրեր: Ի դեպ, Իլհամ Ալիեւին ուղղված նամակում Լապշինը ներողություն է խնդրել, նշել, որ ինքը չի իմացել, որ «ապօրինաբար է հատում Ադրբեջանի տարածքը» եւ շեշտել է, որ «Ղարաբաղը եղել է Ադրբեջանի տարածք, կա եւ մնալու է»: Մի մութ հարց է մնում. Լապշինն այս նամակը գրել է նախքան Բաքվի բանտում ինքնասպանության փորձ անե՞լը, թե՞ դրանից հետո: Ամեն դեպքում շուրջ 10 երկրից բլոգերներ պատրաստվում են ժամանել Արցախ, ոչ ապօրինաբար, Հայաստանի տարածքով: |
