ՄԻԱՑՅԱԼ «ԱՐՄԵՆՊՐԵՍ» Հ. Աֆ. ՀՀ կառավարությունը որոշում է կայացրել «Հայաստանի Հանրապետություն-Ռեսպուբլիկա Արմենիա» եւ «Հանրապետություն» փակ բաժնետիրական ընկերությունները փակ բաժնետիրական ընկերությանը միացնելու մասին: Նոյեմբերի 9-ին ընդունված նախագծի հիմնավորման համաձայն, կառավարության որոշման նախագծի ընդունման անհրաժեշտությունը պայմանավորված է այն հանգամանքով, որ երեք ՓԲԸ-ների գործառույթները մասամբ համընկնում են: «Հայաստանի Հանրապետություն-Ռեսպուբլիկա Արմենիա» եւ «Հանրապետություն» փակ բաժնետիրական ընկերությունները «Արմենպրես» փակ բաժնետիրական ընկերությանը միացման ձեւով վերակազմակերպելու արդյունքում հնարավոր կլինի կենտրոնացնել երեք կազմակերպությունների ռեսուրսներըՙ աշխատանքի առավել արդյունավետ կազմակերպման նպատակով: Բացի այդ, ՓԲԸ-ների միացումը հնարավորություն կտա տնտեսել պետական բյուջեի միջոցները, կհանգեցնի կրկնվող գործառույթների օպտիմալացմանն ու կրճատմանը, ինչպես նաեւ ոլորտի առավել արդյունավետ կազմակերպմանը»,- նշված է հիմնավորման մեջ: Հիշեցնենք, որ «Արմենպրես» փակ բաժնետիրական ընկերության հիմնադրի լիազոր ներկայացուցիչներն ենՙ Հանրային կապերի եւ տեղեկատվության կենտրոն ՊՈԱԿ-ի տնօրենըՙ 50% բաժնետոմսով, ՀՀ վարչապետի մամուլի քարտուղարըՙ 25 տոկոս բաժնետոմսով, կառավարության աշխատակազմի տեղեկատվության եւ հասարակայնության հետ կապերի վարչության պետըՙ 25 տոկոս բաժնետոմսով: | 
