ՆԵՆՍԻ ԳՐԻԳՈՐՅԱՆԻ «ԶԱԲԵԼԸ» ԲԵՄԱԿԱՆԱՑՎԵԼ Է Հ. ԾՈՒԼԻԿՅԱՆ, (The Arm. Mirror-Spectator) Ամերիկահայ գրող Նենսի Գրիգորյանի մրցանակակիր առաջին վեպըՙ «Զաբել» խորագրով, որ պատմում է ցեղասպանության ժամանակ հորը կորցրած, դեպի սիրիական անապատները բռնագաղթված, որբանոցում, այնուհետեւ հարուստ թուրքի ընտանիքում մեծացած հայ աղջկա ոդիսականը, որ իրեն հասցնում է Մ. Նահանգներ, որտեղ նոր փորձություններ են պատուհասում նրան, «Egg & Spoon» թատերախմբի բեմադրությամբ նոյեմբերի 14-17-ը ներկայացվել է Նյու Յորքի ՍոՀոյում գործող «Access» թատրոնում: Վեպը պիեսի էր վերածել Սիրակուզա համալսարանի դրամատուրգիայի բաժնի դասախոս Լեսլի Նոբելը , որ 2015-ին իր ուսանողներից Սարինե Կարապետյանի , Ջուլիան Գառնիկի , Քեթրին Գիդդինկսի եւ Լինդսի Նյուտոնի մասնակցությամբ փորձնական բեմականացրել էր այն համալսարանում: Գաղափարը մտահղացել է Սարինեն, երբ զգացել է, որ կուրսում շատերը չգիտեն Հայոց ցեղասպանության մասին: Նա այժմ պրոդյուսերներից մեկն է: Եղեռնի հարյուրամյակի օրերին նա մտադիր է եղել պիեսը մեծ բեմ բարձրացնել, բայց նախապատրաստական աշխատանքները մի փոքր ավելի ժամանակ են խլել, քան պատկերացնում էր, եւ միայն հիմա է ժամանակը հասունացել: «Զաբելի» միջոցով մենք ցանկացել ենք հավերժացնել հիշատակը 1,5 միլիոն հայերի: Մեծացել եմ հրեական ընտանիքում, որտեղ մայրս ուղեղումս դրոշմել է մի պատգամՙ «մենք չպետք է մոռանանք»: Այո՛, մենք պետք է հիշենք բոլոր նրանց, ովքեր հետապնդումների զոհ գնացին, որպեսզի չթույլատրենք նման երեւույթի կրկնությունը», նշել է բեմադրության առթիվ թատրոնի տնօրեն Ադամ Կոյը : |
