ԶԻՆԵԼ, ԹԵ՞ ԶԻՆԱԹԱՓԵԼ ՕՍԻՊՅԱՆ ԼԱՈՒՐԱ Սահմանին ապրողներին զենք տալու նախագիծ կա խորհրդարանում, կա նաեւ մարզպետի հրամանըՙ բնակիչներից հավաքել զենքերը: «Մի գյուղում երեսունհինգ կռվող էսօր զենք չունեն նույնիսկ որսորդական, սրա նպատակը մենք ընդհանրապես չենք հասկանում...»,- նշում է Տավուշի կամավորներից մեկը: Տավուշի մարզպետի խոսքով զենք պետք է լինի միայն բանակում ծառայողների մոտ, ասելով, որ գյուղացիները ոչ տեղին են կրակում: «Ժողովրդին գցում են պանիկայի մեջ էն մարդիկ, որոնք խմիչքին մոտիկ են: Կան մարդիկ, ովքեր ուզում են իրավիճակը միշտ լարված լինի, իսկ դա անթույլատրելի ա»: Բայց այս որոշմամբ միայն խմիչքի հետ սեր ունեցողները չեն որ անզեն են մնացել. ոստիկանությունը վերցրել է անգամ Տավուշի մարզի Արավուս գյուղի երեսունհինգ կամավորի ունեցած ընդամենը հինգ զենքը: Գյուղում տներ կան, որ թշնամու դիրքից 100-200 մետր են հեռու: «Մեր գյուղերը այնպիսի դիրքում են գտնվում, որ յուրաքանչյուր պահի կարող է դիվերսիոն ներթափանցման փորձ իրականացվել»,- նշում են Տավուշի կամավորներից: Կամավորների խումբը, երբ դեռ զենք ունեին, Արավուսի հովվին փրկել են ադրբեջանցիների ճիրաններից: Ֆելիքս Ավագյանին ադրբեջանցիները քաշքշելով փորձել էին առեւանգել, հետո տեսել էին հայ զինծառայողներին, բավարարվել նրան հարվածելով ու հետ քաշվել: Հովիվը եղել է հայկական սահմանում թշնամու դիրքից 50 մետր հեռու... Գյուղապետը կանգնում է սահմանին եւ հսկում, որ գյուղացին անասուն պահի, բայց ոչ ոք չի կարող երաշխավորել, որ գյուղացին հոտն առած տուն կդառնա... | 
