ԿԱՆՆԻ ԿԻՆՈՓԱՌԱՏՈՆ. ԺԻՐԱՅՐ ՓԱՓԱԶՅԱՆԸ ԿԱՐՄԻՐ ԳՈՐԳԻ ՎՐԱՅՈՎ Հ. Ծ. Կաննի միջազգային կինոփառատոնի օրերին բազմաթիվ այլ ֆիլմերի թվում ցուցադրվել է նաեւ ֆրանսահայ կինոռեժիսոր Ռոբեր Կետիկյանի «Խենթի պատմությունը» («Une histoire de fou»), որի առաջին մասում ֆրանսահայ տաղանդավոր դերասան, բեմադրիչ եւ թարգմանիչ Ժիրայր Փափազյանը կատարում է «Նեմեսիս» շարժման առաջնորդի դերը: Այդ առթիվ իր կարիերայի ընթացքում առաջին անգամ Փափազյանը ֆիլմի ռեժիսորի եւ մյուս դերակատարների հետ քայլել է հռչակավոր կինոփառատոնի կարմիր գորգի վրայով: Ֆիլմը, ըստ ստացված հաղորդագրության, պատմում է մարդասիրական առումով բավական խորը ուսումնասիրված ԱՍԱԼԱ-ի հանդուգն գործողությունների մասին Եվրոպայում 1980-ական թվերին: Որպես ներշնչանքի աղբյուր ծառայել է իսպանացի լրագրող Խոսե Անտոնիո Գուրիարանի «Ռումբը» («La Bomba») վեպը, որը հիմնված է իրական պատմության վրա: Հեղինակը պատահաբար ողջ էր մնացել հեռախոսախցիկում տեղադրված ռումբի պայթյունից: «Կետիկյանը բացառիկ հմտությամբ կարողացել է ե՛ւ տեղեկացնել, ե՛ւ համակողմանի բացատրել Հայոց ցեղասպանության եւ հետագայում «Նեմեսիս» շարժման հետ առնչվող փաստերն ու հանգամանքները: Ֆիլմը լարված ուշադրությամբ է դիտվում», նշել է Ժիրայր Փափազյանը, ավելացնելով, որ Կաննից մի փոքր առաջ Նյու Յորքում ԹՄՄիության «Մհեր Մկրտչյան» թատերախմբի հետ ինքը բեմադրել էր Պերճ Զեjթունցյանի «Ոտքի՛, դատարանն է գալիս» պիեսը, որը նույն թեման է շոշափում: «Շնորհակալություն, Ռոբեր: Հպարտ եմ, որ մասնակցել եմ այդ ֆիլմի նկարահանումներին», եզրափակել է նա: | 
