ՀԱՐԳԱՆՔԻ ՏՈՒՐՔ ԼԻԲԱՆԱՆԱՀԱՅ ԿՈՄՊՈԶԻՏՈՐ ՊՈՂՈՍ ՋԵԼԱԼՅԱՆԻ ՀԻՇԱՏԱԿԻՆ Հ. Ծ. Լիբանանի մշակույթի նախարար Ղաթթաս Խուրիի բարձր հովանավորությամբ եւ Լիբանանում Հայաստանի դեսպանատան աջակցությամբ մարտի 8-ին ՀԲԸՄիության Լիբանանի մասնաճյուղը կազմակերպել է դասախոսություն «Պողոս Ջելալյանը եւ նրա ներդրումը լիբանանյան երաժշտության մեջ» թեմայով: Միջոցառումը, ըստ ստացված հաղորդագրության, անցկացվել է «Ֆրանկոֆոնիայի ամսվա» շրջանակներում: Ներկա են եղել Ջելալյանի կինը եւ որդին, ՀՀ դեսպանատան հյուպատոս Աշոտ Վարդանյանը, Հայ կաթողիկե եկեղեցու ներկայացուցիչը, Լիբանանի Կենտրոնական բանկի փոխկառավարիչը, մշակույթի նախարարության ներկայացուցիչը եւ բարձրաստիճան այլ անձնավորություններ: Պողոս Ջելալյանը (1927-2011) հռչակ է ձեռք բերել հատկապես տարբեր մշակույթների (մասնավորապես հայկական եւ մերձավոր-արեւելյան) միաձուլումից հորինած իր ստեղծագործությունների շնորհիվ: Նա դաշնամուրի, ջութակի, հոբոյի, ֆլեյտայի եւ այլ գործիքների համար երաժշտություն է գրել եւ մեծ ազդեցություն է ունեցել լիբանանյան երաժշտության զարգացման գործում: Բարձրորեն է Ջելալյանը գնահատվել Ֆրանսիայում, որպես հետեւորդը Լիբանանում ֆրանսիական երաժշտաարվեստին: Նա միշտ մերժել է հրավերները այցելելու Խորհրդային Հայաստան, մերժելով տիրող վարչակարգը... Ապրիլի 5-ին Ֆրանկոֆոնիայի միամսյակի շրջանակներում ՀԲԸՄ-ն մեկ այլ դասախոսություն է կազմակերպելու նվիրված Լիբանանում հայկական ճարտարապետության հայտնի նմուշներին (խորհրդարանի շենքը, Էլ Աաբեդ ժամացույցի աշտարակը, Սբ. Պետրոսի Բազիլիկան եւայլն): | 
