«ԽՈՐՏԱԿՎԱԾ ԱՆՈՒՐՋՆԵՐԸ»ՙ ԱՐՏԱԿԱՐԳ ԳԻՐՔ Հ. ԾՈՒԼԻԿՅԱՆ Ֆրեզնոյում նորաստեղծ Հայկական ուսումնասիրությունների ընկերությունը (ՀՈՒԸ) «Արտակարգ գիրք» անվանակարգի իր առաջին մրցանակը շնորհել է Պետրոս Տեր-Մաթոսյանի «Հեղափոխության խորտակված անուրջները: Ազատությունից դեպի բռնությունՙ օսմանյան կայսրության մայրամուտին» հատորին, որը լույս է ընծայել Ստենֆորդ համալսարանի հրատարակչությունը 2014 թվին: ՀՈՒԸ-ն հիմնվել է 2015-ին: Իր այս առաջին մրցանակին կարող էին մասնակցել 2013-ի ապրիլի 1-ից մինչեւ 2015-ի ապրիլի 30-ը հրատարակված գրքեր: Տեր-Մաթոսյանը, ըստ «Արմինյն Միրոր-Սփեքթեյթր» շաբաթաթերթի, ստանալու է 1000 դոլարի դրամական պարգեւ եւ ՀՈՒԸ-ի հավաստագիրը այդ կապակցությամբ: Գիրքը անդրադառնում է 1908-ի Երիտթուրքերի հեղափոխությանը եւ հիմնականում քննարկում է երեք էթնիկական խմբերիՙ արաբների, հրեաների եւ հայերի վրա նրա թողած ազդեցությունները: Հեղափոխությունից մեծ ակնկալիքներ ունեին այդ խմբավորումները, որոնք սակայն ոչ միայն չիրականացան, այլեւ փոխարինվեցին ողբերգական իրադարձություններով: Թեման արդիական է Մերձավոր Արեւելքում կատարվող «հեղափոխությունների» լույսի ներքո, որտեղ դարձյալ հույսերն ու ակնկալիքները չեն համապատասխանում իրականությանը: Հատորը թուրքերենի է թարգմանվել 2016-ին: «Իր խորը ուսումնասիրված եւ հիմնավորապես փաստարկված գրքում Տեր-Մաթոսյանը կարողացել է գերազանց վարպետությամբ ներկայացնել խոստումների եւ իրականության միջեւ գոյություն ունեցող վիհը» նշել է Պրինստոն համալսարանից Շուքրու Հանիօղլուն: Տեր-Մաթոսյանը ծնվել եւ մեծացել է Երուսաղեմում: Ավարտել է տեղի եփրայական համալսարանը, որտեղ էլ սկսել է իր ուսումնասիրությունները կատարել մասնավորապես «իսլամական եւ մերձավորարեւելյան ուսումնասիրությունների բաժնում»: Դոկտորական է պաշտպանել Կոլումբիա համալսարանում (ԱՄՆ) 2008-ին: Ապա մինչեւ 2010 թվականը դասավանդել է Մասաչուսեթսի Տեխնոլոգիական ինստիտուտի (MIT) պատմության ֆակուլտետում: Այժմ Նեբրասկայի համալսարանի պատմության բաժանմունքում Մերձավոր Արեւելքի պատմության պրոֆեսորի օգնական է: Սուլեյման Ա. Մուրադի եւ Նաոմի Կոլտուն-Ֆրոմի հետ համահեղինակ է հառաջիկայում հրատարակվելիք «Ռուտլեջյան ձեռնարկ Երուսաղեմի մասին» հատորի: | 
