«ՀԱՅՈՒ ՀՈԳԻՆ» ՀԱՄԵՐԳՙ ՆՅՈՒ ՅՈՐՔՈՒՄ ՌԱԿ «Պայքար» շաբաթաթերթի հերթական համարը Հակոբ Վարդիվառյանի գրչով տեղեկացնում է, որ օրերս դասական ուշագրավ համերգ է տեղի ունեցել Նյու Յորքում, մասնակցությամբ աշխարհահռչակ ջութակահար Անի Գավաֆյանի, տաղանդավոր թավջութակահար Անի Գալայջյանի եւ արվեստի աշխարհում քաջածանոթ դաշնակահար Օրիան Ուայզի: Համերգը նվիրված է եղել Թեքեյան մշակութային միության հիմնադրության 70-ամյակին, իր շուրջ համախմբելով նյույորքահայ արվեստասերներինՙ Արեւելյան թեմի առաջնորդ Խաժակ արք. Պարսամյանի եւ ՄԱԿ-ում ՀՀ դեսպան Զոհրապ Մնացականյանի գլխավորությամբ: Եռյակը կատարել է Յոզեֆ Հայդնի, Սերգեյ Ռախմանինովի եւ Առնո Բաբաջանյանի ստեղծագործություններից: Համերգից առաջ օրվա խորհուրդը ներկայացրել է ԹՄՄ Նյու Յորք-Նյու Ջըրսիի մասնաճյուղի ատենապետուհի տիկին Հիլդա Հարությունյանը: | 
