ՀԱՅ ԱՐՎԵՍՏԱԳԵՏԻ ԳՈՐԾԵՐԸ ՓԱՐԻԶԻ «ԳՐԱՆ ՊԱԼԵ»-ՈՒՄ Ա. Բ. Փետրվարի 13-17-ին Փարիզի «Գրան պալեում» (Գեղեցիկ արվեստների մեծ պալատ) կայացել է «Համեմատություններ - 2019» խորագրով ցուցահանդեսը Ֆրանսիայի նախագահ Էմանուել Մակրոնի բարձր հովանավորությամբ: Ցուցահանդեսին մեկական ստեղծագործությամբ մասնակցել են նկարիչներ ամբողջ աշխարհից: Հայաստանը ներկայացել է երեւանցի արվեստագետ Սարգիս Սահակյանի աբստրակտ կտավով: Մեզանում ճանաչված հմուտ ոսկերիչը առաջին անգամ է հանրությանը ներկայացել իր գեղանկարչական աշխատանքով, այն էլ միանգամիցՙ Փարիզում եւ իր ծննդյան 70-ամյակի օրը: Սարգիս Սահակյանը ծնվել է 1949-ին Թբիլիսիում, 1968-ին ավարտել է Երեւանի Գեղարվեստի ուսումնարանը, 1979-ինՙ ԵՊՀ արվեստաբանության բաժինը: Ցուցահանդեսների մասնակցում է 1972-ից: Հայտնի է իր նրբաշուք ոսկեգործական եւ արծաթագործական աշխատանքներով, որոնց ոճը մոտ է աշխարհահռչակ Կառլ Ֆաբերժեին: Սարգիս Սահակյանն ունեցել է անհատական ցուցահանդեսներ Ռուսաստանում, Հնդկաստանում, Հունգարիայում, ԱՄՆ-ում, Ճապոնիայում: Նրա մի շարք ստեղծագործություններ ընդգրկվել են Հայաստանի եւ Մոսկվայի դեկորատիվ-կիրառական արվեստի թանգարաններում: Սույն թվականի մայիսի 13-20-ին Հայաստանի Նկարիչների միությունում առաջին անգամ կցուցադրվեն Սահակյանի կտավները: | 
