ՎԼԱԴԻՄԻՐ ԵՆԳԻԲԱՐՅԱՆԻ ԴԻՆ ԿՏԵՂԱՓՈԽՎԻ ՀԱՅՐԵՆԻՔ Լեգենդար բռնցքամարտիկ, օլիմպիական չեմպիոն Վլադիմիր Ենգիբարյանի դին կտեղափոխվի հայրենիք եւ նա իր վերջին հանգրվանը կգտնի հայրենի հողում: Այս որոշումը կայացվել է մարզաշխարհի ղեկավարության եւ Վլ. Ենգիբարյանի հարազատների կողմից: Լեգենդար բռնցքամարտիկը վերջին տարիներին բնակվում էր Ամերիկայի Միացյալ Նահանգներում, որտեղ էլ 81 տարեկան հասակում կնքել է իր մահկանացուն: Վլ. Ենգիբարյանը եղել է Երեւանի պատանի բռնցքամարտիկների դպրոցի հիմնադիր-տնօրենը, որը հետագայում անվանակոչվել է նրա անունով: Բռնցքամարտիկների մի քանի սերունդներ են ոգեշնչվել նրա հաջողություններով, կրթվել եւ դաստիարակվել մեծ մարզիկի պատգամներով: Նա արժանացել է բազմաթիվ պետական, կառավարական պարգեւների, ձեռք բերել մարզական բարձրագույն տիտղոսըՙ դառնալով օլիմպիական չեմպիոն: Չնայած նա կյանքի վերջին տարիներին հայրենիքում չէր բնակվում, սակայն մշտապես սերտ կապի մեջ է եղել հայրենիքի եւ հատկապես հայաստանյան մարզաշխարհի հետ: Վլ. Ենգիբարյանի հոգեհանգիստը տեղի կունենա փետրվարի 15-ին ժամը 18:00-ին Կոնդի Սուրբ Հովհաննես եկեղեցում, հուղարկավորության արարողությունը կսկսվի փետրվարի 16-ին ժամը 14:00-ին նույն տեղում, աճյունը հողին կհանձնվի Երեւանի քաղաքային պանթեոնում: | 
