ԻՐԱՆՆ ՈՒԶՈՒՄ Է ՎԵՐԱՆԱՅԵԼ ԹՈՒՐՔՄԵՆՉԱՅԻ ՊԱՅՄԱՆԱԳԻՐԸ Իրանի խորհրդարանի պատգամավորները աշխատանք են սկսել Թուրքմենչայի հաշտության պայմանագրի վերանայմանը վերաբերող օրինագծի վրա, հաղորդում է FARS գործակալությունը: Գրող եւ դիվանագետ Ալեքսանդր Գրիբոյեդովի կազմած պայմանագիրը Ռուսական կայսրությունը եւ Պարսկաստանը ստորագրեցին 1828 թվականին: Պատգամավորները պնդում են, թե «ֆրանսիացիների դավաճանության հետեւանքով» Ռուսաստանի նվաճած տարածքները, ըստ պայմանագրի տեքստի, նրան փոխանցվել են ոչ թե առհավետ, այլ 100 տարով, եւ պետք է Իրանին վերադարձվեն ճիշտ այնպես, ինչպես Մեծ Բրիտանիան Հոնկոնգը վերադարձրեց Չինաստանին: Իրանցի պատգամավորները խոսում են «օկուպացված» ադրբեջանական հողերի մասին, մինչդեռ 1826-1828 թթ. պատերազմում Ռուսաստանի հիմնական ձեռքբերումները դարձան Երեւանի եւ Նախիջեւանի խանությունները, որոնց զգալի մասը ներկայումս կազմում է Իրանի դաշնակից Հայաստանը, այլ ոչ թե Ադրբեջանը: Ներկայումս Ադրբեջան կոչվող երկրի մեծ մասը Վրաստանի եւ Դաղստանի հետ Ռուսաստանին էր անցել ավելի վաղՙ 1813 թ. Գյուլիստանի հաշտության պայմանագրով, որը վերջ դրեց 1804-1813 թթ. ռուս-պարսկական պատերազմին: Իրանցի պատգամավորները վերջինս համարում են «Վրաստանը ռուսական օկուպացումից ազատագրելու փորձ»: | 
