«ԱՌՈՂՋԱՊԱՀԱԿԱՆ ԾԻԳ» ՀԻՄՆԱՐԿԻ ԱՇԽԱՏԱԿՑԻ ՆԿԱՏՄԱՄԲ ՔՐԵԱԿԱՆ ԳՈՐԾ Է ՀԱՐՈՒՑՎԵԼ Մ. Խ. Հայաստանի գլխավոր դատախազության տեղեկատվության համաձայն`պետական շահերի պաշտպանության վարչությունում հարուցվել է քրեական գործ «Առողջապահական ԾԻԳ» պետական հիմնարկի աշխատակցի օժանդակությամբ խարդախությամբ հափշտակություն կատարելու եւ պաշտոնեական անփութության փաստերի առթիվ: Հարուցվել է քրեական գործ` ՀՀ քրեական օրենսգրքի 178-րդ եւ 38-178-րդ հոդվածներիի 3-րդ մասերի 1-ին կետերով եւ 315-րդ հոդվածի 2-րդ մասով: Քրեական գործի նախաքննությունն իրականացնում է կառավարությանն առընթեր ոստիկանության քննչական գլխավոր վարչությունը: Առողջապահության նախարարությունից ստացված նյութերի ուսումնասիրությամբ պարզվել է, որ ՀՀ առողջապահության նախարարության «Առողջապահական ԾԻԳ» պետական հիմնարկի եւ ՍՊ ընկերության միջեւ 2009թ. հունիս ամսին կնքվել է պայմանագիր` բժշկական կենտրոններից մեկի շենքի վերանորոգման վերաբերյալ: Ըստ նյութերի` նախատեսված շուրջ 553 միլիոն դրամի աշխատանքներն իրականացնելու ընթացքում ՍՊ ընկերության հիմնադիր-տնօրենը, խաբեությամբ ուրիշի գույքի հափշտակություն կատարելու դիտավորությամբ, 2009-2010թթ. կատարողական ակտերում կեղծ տվյալներ ներառելու միջոցով, հավելագրել է փաստացի չկատարված աշխատանք` հիմնարկի շինարարական աշխատանքների վերահսկման մասնագետի օժանդակությամբ եւ պաշտոնատար անձանց թողտվությամբ խաբեությամբ հափշտակել է առանձնապես խոշոր չափերի` շուրջ 20 միլիոն դրամ: | 
