«ԼԻԿԲԵԶ»` ԱԴՐԲԵՋԱՆԻ ԳԼԽԱՎՈՐ «ՔԱՂՏԵԽՆՈԼՈԳԻ» ՀԱՄԱՐ Վ. Ա. Ադրբեջանի նախագահին առընթեր ռազմավարական հետազոտությունների կենտրոնի տնօրեն Ֆարհադ Մամեդովը երեկ Լոնդոնում կայացած բրիտանա-ադրբեջանական համագործակցության հեռանկարներին նվիրված խորհրդաժողովի շրջանակներում անդրադարձել է նաեւ Լեռնային Ղարաբաղի «օկուպացիայից բխող վտանգներին»: Ադրբեջանցի պաշտոնյան որեւէ նորություն չի ասել, բայց նրա խոսքն աչքի է ընկել զբաղեցրած դիրքին անհարիր անգրագիտությամբ: Մասնավորապես, որպես «չորրորդ սպառնալիք» նշելով «էկոլոգիական բաղադրիչը», Մամեդովը որպես «ապացույց» մատնանշել է «Արազ (Արաքս- Վ. Ա.) գետի աղտոտվածությունը, որը հարեւան երկրների կողմից օգտագործվում է որպես խմելու ջուր», եւ ավելացրել, որ «վտանգը այն է, որ Հայաստանը շահագործում է Ադրբեջանի կառուցած Սարսանգի ջրամբարը»: Ադրբեջանցի «քաղտեխնոլոգի» ասածից հետեւում է, որ «Սարսանգի ջրամբարը կառուցված է Արաքս գետի վրա, որի աղտոտվածությունը վտանգավոր է հարեւան երկրների բնակչության համար»: Մինչդեռ Հարավային Կովկասի ֆիզիկական աշխարհագրությանը գոնե հանրակրթական դպրոցի մակարդակով ծանոթ յուրաքանչյուր ոք գիտի, որ Սարսանգի ջրամբարը կառուցված է Լեռնային Ղարաբաղի Թարթառ գետի միջին հոսանքում` ԼՂՀ Մարտակերտի շրջանի տարածքում: Իսկ Թարթառը, ի գիտություն Ֆարհադ Ալիեւի, ոչ թե Արաքսի, այլ` Կուր գետի վտակն է: Հետեւաբար Սարսանգի ջրամբարի շահագործումը ոչ մի կերպ չի կարող Արաքսի աղտոտվածության պատճառ դառնալ: Իլհամ Ալիեւին առընթեր ռազմավարական հետազոտությունների կենտրոնի տնօրենը հավանաբար այն մտայնությամբ է առաջնորդվել, որ Հարավային Կովկասից հազարավոր մղոններով հեռու Լոնդոնում հնարավոր է աշխարհագրական հանրահայտ իրողություններն անգամ ներկայացնել Ադրբեջանի «ազգային շահերի», իրականում` փաստերի համընդհանուր խեղաթյուրման համատեքստում: Եվ ստացվել է, որ Ադրբեջանում ռազմավարական հետազոտություններ է կատարում մի հաստատություն, որի տնօրենը կամ մտավոր հետամնաց է, չգիտի, թե ինչից եւ ինչպես է խոսում, կամ` խարդախ, որը հեղինակավոր լսարանին կանխատրամադրված կեղծ տեղեկատվություն է տալիս: Երկու դեպքում էլ տուժում է ոչ թե իրականությունը, այլ` ադրբեջանական իշխանությունների առանց այդ էլ կասկածահարույց հեղինակությունը: Քանի որ, պետք է համոզված լինել, Լոնդոնում ավելի լավ գիտեն իրենց համար հետաքրքրություն ներկայացնող տարածաշրջանի պատմությունը եւ աշխարհագրությունը, քան կարծել է Ֆարհադ Մամեդովը: | 
