ՎԻՎԱՍԵԼ-ՄՏՍ-Ը ԿՐԿԻՆ «ՎԵՐԱԴԱՐՁԻ» ԴԱՍԱԿԱՆ ԵՐԱԺՇՏՈՒԹՅԱՆ ՓԱՌԱՏՈՆԻ ԳԼԽԱՎՈՐ ՀՈՎԱՆԱՎՈՐՆ Է «Արվեստների պատկերասրահ» մշակութային հիմնադրամը ՎիվաՍել-ՄՏՍ-ի գլխավոր հովանավորությամբ ներկայացնում է «Վերադարձի» դասական երաժշտության յոթերորդ փառատոնը: Արամ Խաչատրյան համերգասրահում մեկնարկել է «Վերադարձի» դասական երաժշտության յոթերորդ փառատոնը: Հայաստանի հեռահաղորդակցության առաջատար օպերատոր ՎիվաՍել-ՄՏՍ-ի շարունակական հոգածության եւ աջակցության շնորհիվ, արդեն ավանդական դարձած փառատոնն այս տարի եւս մայրաքաղաքի հանդիսատեսին հնարավորություն կընձեռի հանդիպելու արտերկրում ապրող եւ ստեղծագործող տաղանդաշատ մեր հայրենակիցներին, ունկնդրելու դասական երաժշտության գլուխգործոցներ: «Ժամանակակից աշխարհում արվեստը սահմաններ չի ճանաչում: Մշակութային հարուստ ժառանգություն ունեցող երկրի արվեստագետները կարող են ինքնադրսեւորվել ու ստեղծագործել թե՛ հայրենիքում, եւ թե՛ արտերկրում: Վերջին տասնամյակներում դասական երաժշտարվեստի ականավոր ներկայացուցիչներից շատերը մեկնել են Հայաստանիցՙ առավել կատարելագործվելու եւ համաշխարհային բարձունքներ նվաճելու համար: Անշուշտ, մենքՙ հայերս, հպարտություն ենք ապրում տեսնելով, թե ինչպես են մեր հայրենակիցներն իրենց արժանի տեղը գտնում միջազգային ասպարեզում: Միաժամանակ, պետք է հիշել, որ խոստումնալից երիտասարդ կատարողների բացահայտումը, նրանց հետագա զարգացումն ու սերնդափոխությունը ենթադրում են շարունակական կապի առկայություն եւ փորձի փոխանցում: Դրա համար անհրաժեշտ է, որպեսզի դասական երաժշտության հայազգի կատարողներն ու ստեղծագործողները հնարավորինս հաճախակի հանդես գան հայրենիքում»,-նշել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը : Համերգային ծրագիրը, որը նվիրված է Հայաստանի պետական կամերային նվագախմբի հիմնադիր, ականավոր երաժիշտ Զարեհ Սահակյանցի 80-ամյակին, ներկայացրել են տաղանդաշատ երաժիշտներ Դավիթ Հարությունյանը (ջութակ, Ֆրանսիա), Տոմոկո Ակասական (ալտ, ճապոնիա), Միքայել Հախնազարյանը (թավջութակ, Գերմանիա), Մերի Մովսիսյանը (սոպրանո), ինչպես նաեւ Հայաստանի պետական կամերային նվագախումբը` գեղարվեստական ղեկավար եւ գլխավոր դիրիժոր Վահան Մարտիրոսյանի ղեկավարությամբ: Ծրագրում ընդգրկված էին Զ. Սահակյանցի փոխադրումները` Ձայնի եւ կամերային նվագախմբի համար, Վ.Ա. Մոցարտի, Տ. Վիտալիի, Մ. Ռավելի, Է. Բլոխի, Կ. Ատտերբերգի ստեղծագործությունները: Փառատոնը հանդիսատեսին կներկայանա 6 համերգից բաղկացած համերգաշարով եւ իր աշխատանքը կեզրափակի նոյեմբերի 20-ին: |
