ՄԽԻԹԱՐՅԱՆԻ ՆԿԱՏՄԱՄԲ ԱՆԳԼԻԱՅՈՒՄ ՀԵՏԱՔՐՔՐՈՒԹՅՈՒՆԸ ՉԻ ՆՎԱԶԵԼ Givemesport.com կայքն անդրադարձել է ՀՀ հավաքականի եւ Դորտմունդի «Բորուսիայի» կիսապաշտպան Հենրիխ Մխիթարյանիՙ «Մանչեսթր Յունայթեդ» տեղափոխվելու հնարավորությանը: «Երբ Սինձի Կագավան Դորտմունդի «Բորուսիայից» տեղափոխվեց «Մանչեսթր Յունայթեդ», բոլորը սպասում էին, որ նա կդառնա անգլիական ակումբի առաջատարներից մեկը: Սակայն Կագավան չկարողացավ ցուցադրել իր լավագույն խաղը եւ ամրապնդվել թիմի մեկնարկային կազմում: «Մանչեսթր Յունայթեդի» լավագույն տարբերակը կլիներ Կագավային փոխանակել «Բորուսիայի» առաջատարներից մեկի հետ: Խոսքը ոչ թե Մարկո Ռոյսի կամ Իլկայ Գյունդոգանի մասին է, այլ Հայաստանի հավաքականի կիսապաշտպան Հենրիխ Մխիթարյանի: 24-ամյա հայ ֆուտբոլիստը, որին երկար ժամանակ ցանկանում էր թիմ հրավիրել «Լիվերպուլը», չափազանց տաղանդավոր է: Մխիթարյանը հիանալի է տեսնում խաղադաշտը եւ գերազանց փոխանցումներ կատարում: Զարմանալի չէ, որ իր հայրենիքում նա ֆուտբոլի պատմության մեջ լավագույն խաղացողներից է: Հենրիխը խաղում է փլեյմեյքերի դիրքում եւ կարճ ժամանակահատվածում ցուցադրել է իր ունակությունները: Հենրիխին «Բորուսիան» ամռանն է ձեռք բերել, ուստի դա կարող է խանգարել նրա հնարավոր տրանսֆերի իրականացմանը: Սակայն հետագայում ամեն ինչ հնարավոր է: Անկասկած, Մխիթարյանը կհարմարվի «Մանչեսթր Յունայթեդի» խաղաոճին», գրում է կայքը: Հենրիխ Մխիթարյանին է անդրադարձել նաեւ վրացական Worldsport.ge կայքը. «3 տարի է անցել Հայաստանի եւ Վրաստանի երիտասարդական հավաքականների հանդիպումից, որն ավարտվեց հյուրերի հաղթանակովՙ 3-2: Մեկ տարի անց ՀՀ երիտասարդական հավաքականի ավագը դարձավ Դոնեցկի «Շախտյորի» ֆուտբոլիստ, հետագայում ճանաչվեց ուկրաինական ակումբի լավագույն խաղացող, իսկ ամռանը տեղափոխվեց Դորտմունդի «Բորուսիա», որը դուրս էր եկել չեմպիոնների լիգայի եզրափակիչ: Գերմանական ակումբում նա ստացել է 10 համարի մարզաշապիկը, որը պատկանում էր Մյունխենի «Բավարիա» տեղափոխված Մարիո Գյոտցեին: Սկզբնական շրջանում նա «Շախտյորում» ցածր աշխատավարձ էր ստանում եւ ապրում էր մարզաբազայում: Աշխատավարձի բարձրացումից հետո էլ նա ապրում էր այնտեղ, որի պատճառով նրան բազայի տնօրեն էին անվանում: Նրա ընտանիքում մեծ ուշադրություն էին դարձնում կրթությանը: Հենրիխի քույրըՙ Մոնիկան, Միշել Պլատինիի օգնականն է: Նա սովորել է Լիոնում: 24-ամյա ֆուտբոլիստը տիրապետում է 4 օտար լեզուների: Անգլերեն նա սովորել է դպրոցում, ֆրանսերենՙ Ֆրանսիայում, իսկ պորտուգալերենըՙ «Սան Պաոլոյում» 4-ամսյա փորձաշրջան անցնելու ժամանակ: Մխիթարյանի հայրը նույնպես լավ ֆուտբոլիստ էր: 80-ականների «Արարատում» քչերը կարող էին համեմատվել Համլետ Մխիթարյանի հետ: Հայրը ֆուտբոլից բացի, ստիպեց Հենրիխին սիրել նաեւ գիրքը: Այսօր հաճախ են ասում, որ վրացիները չունեն Մխիթարյանի մակարդակի ֆուտբոլիստ: Այո, դա այդպես է: Սակայն դա վերաբերում է ոչ միայն վրացիներին, այլեւ ռուսներին եւ ուկրաինացիներին»: | 
