ԻՐԵՆՑ ԲՆԱԿԱՐԱՆՆԵՐՆ ԵՆ ՊԱՀԱՆՋՈՒՄ ԵՆ «ՏՈՆՈՒՍԻՑ» ԵՎ «ԱՐՑԱԽԲԱՆԿԻՑ» ԱՐԱ ՄԱՐՏԻՐՈՍՅԱՆ «Տոնուս» շինարարական ընկերության սնանկացումից հետո «Արցախբանկին» է անցել այն շենքը, որը կառուցել է ընկերությունը, եւ որը որպես գրավ վերցրել էր բանկը` իր տրամադրած վարկի դիմաց: Այս ամենի հետեւանքով մոտ 150 ընտանիքներ, որոնք բնակարաններ էին գնել այդ շենքում, չեն կարողանում ստանալ իրենց բնակարանները: Նրանց մի մասը երեկ կառավարության շենքի մոտ էր հավաքվելՙ կառավարության աջակցությունը ստանալու, որպեսզի իրենք «զրոյական կորուստով» դուրս գան այս խնդրից: Բնակարանի համար վճարած, բայց չստացած մարդիկ իրենց դժգոհությունն էին հայտնում հատկապես «Տոնուս» ընկերության ղեկավար, «Բարգավաճ Հայաստան» կուսակցությունը ներկայացնող Աշոտ Տոնոյանից: Ըստ նրանցՙ Աշոտ Տոնոյանի հետ հնարավոր չի լինում հանդիպել եւ պահանջել իրենց բնակարանները: Բողոքողների խոսքերովՙ Աշոտ Տոնոյանը Հայաստանում է, բայց շրջում է թիկնապահներով եւ խուսափում իրենց հետ հանդիպելուց: Կառավարության շենքի առջեւ հավաքված բնակիչները նշեցին նաեւ, որ «Արցախբանկը» նույնպես չի ցանկանում գրեթե 90 տոկոսով պատրաստ շենքի բնակարանները հանձնել իրենց: Նրանք հույս հայտնեցին, որ կառավարությունն ու երկրի նախագահը կօգնեն իրենց, եւ իրենց բողոքն արտահայտելու համար շարժվեցին դեպի «Արցախբանկ»: | 
