2 ՄԻԼԻՈՆԻ ԲԺՇԿԱԿԱՆ ՍԱՐՔԱՎՈՐՈՒՄՆԵՐ ՀԱՅԱՍՏԱՆԻՆ ԵՎ ԱՐՑԱԽԻՆ Հ. Ծ. Գլենդեյլից հրատարակության խնդրանքով խմբագրությանը հասցեագրված մամլո հաղորդագրությունը տեղեկացնում է, որ «Prime Healthcare Management, Inc.» (PHM) միավորումը, որ «Prime Healthcare Services» կազմակերպության մաս է կազմում եւ Մ. Նահանգներում հիվադանոցներ տնօրինող ամենամեծ ընկերություններից մեկն է, «Միացյալ հայկական ֆոնդի» համագործակցությամբ 2 միլիոն դոլարի արժողությամբ բժշկական սարքավորումներ (ներառյալ հիվանդանոցային անկողիններ, հիվանդների վիճակահսկիչներ, սննդային ներարկիչներ, գործիքներ եւ այլ պարագաներ) է նվիրել Հայաստանում եւ Արցախում գործող հիվանդանոցներին: «Այս նպաստը առաջինն է մի շարք նվիրատվությունների, որոնց ընդհանուր գումարը հասնելու է 5 միլիոն դոլարի», հայտնել է այդ առթիվ PHM միավորման հիվանդանոցային գործառնությունների նախագահ Մայքլ Սարյանը, ավելացնելով. «Ուրախ ենք, որ կարելիությունը ընձեռվեց կենսական կարեւորության բժշկական այս պիտույքները նվիրելու Հայաստանին եւ Արցախին»: Ըստ հաղորդագրության PHM-ն հիվանդանոցների տնօրիման մրցանակակիր ընկերություն է, որ Ամերիկայի տարածքում գործարկում է 26 հիվանդանոցներ, իսկ «Միացյալ Հայկական ֆոնդը», որն ստանձնել է ապրանքների բաշխման պատասխանատվությունը, ստեղծվել է 1989-ին: Մինչ օրս ՄՀՖ-ն Հայաստան եւ Արցախ է փոխադրել 690 միլիոն դոլարի արժողությամբ մարդասիրական օգնություն: |
